65.ബോക്സര്‍ (Boxer)

നായ്ക്കളെ വളര്‍ത്തുന്നവര്‍ക്കിടയില്‍ ഏറ്റവും പ്രിയങ്കരനായ ഇനങ്ങളില്‍ ഒന്നാണ് ഈ ഇടത്തരം വലിപ്പമുള്ള ബോക്സര്‍. ഇവയുടെ വാലും ചിലപ്പോഴൊക്കെ ചെവിയും മുറിക്കുക പതിവാണ്.. ചെവി മുറിച്ചു സ്റ്റൈലന്‍ ആക്കി ഇവയെ ഡോഗ് ഷോകളില്‍ പങ്കെടുപ്പിക്കാറുണ്ട്.

പൊതുവെ വലിയ ചൂടു കാലാവസ്ഥ ഇഷ്ടം ഇല്ലാത്ത ഇനം ആണെങ്കിലും ഏത് കാലാവസ്ഥയോടും ഇവ പൊരുത്തപ്പെട്ടോളും. മുതിര്‍ന്ന നായ ആണെങ്കിലും നായ്‌കുട്ടികളെ പോലെ പെരുമാറി വീട്ടില്‍ ഉള്ളവരുടെ മനം കവരാന്‍ മിടുക്കനാണ് എന്നതും കുട്ടികളോടും മുതിര്‍ന്നവരോടും മാന്യനായി പെരുമാറും എന്നതും ഏവര്‍ക്കും പ്രിയാങ്കരനാക്കാന്‍ കാരണം ആണ്.

ഇരുപത്തിഅഞ്ച് ഇഞ്ചോളം ഉയരം വയ്ക്കുന്ന ഇവ മുപ്പത്തിഏഴ് കിലോ വരെ ഭാരവും വയ്ക്കാറുണ്ട്..

അധികം നീളം ഇല്ലാത്ത രോമം നല്ല ഭംഗിയുള്ളതും അധികം പരിചരണം വേണ്ടാത്തതും ആണ്..വളരെയേറെ അനുസരണയും ബുദ്ധിയും ഉണ്ടെങ്കിലും ചിലപ്പോള്‍ കുട്ടികളെ പോലെ പെരുമാറും എന്നുള്ളതിനാല്‍ തീരെച്ചെറിയകുട്ടികളെ ഇവയുടെ അടുത്ത് വിടുമ്പോള്‍ സൂക്ഷിക്കുക.കാരണം ഇവ കളിക്കുന്നതിനിടയില്‍ കുട്ടികളെ തട്ടിയിടാന്‍ സാധ്യത ഉണ്ട്..

ചിലപ്പോള്‍ അപരിചിതരായ നായകളോടും മറ്റു ആണ്‍ നായകളോടും അല്പം ദേഷ്യം കാട്ടാറുണ്ട്‌..ധൈര്യശാലിയായ ഇവയ്ക്കു നല്ല വ്യായാമവും ആവശ്യമുണ്ട്..

കാവലിനും രക്ഷയ്ക്കും മികച്ചയിനമായ ഇവ പൊതുവെ ആരോഗ്യപ്രശ്നങ്ങള്‍ ഇല്ലാത്ത ഇനം ആണ്..

എട്ടുമുതല്‍ പന്ത്രണ്ടു വയസ്സുവരെ ആയുസ്സുള്ള ഇവയുടെ ഒരു പ്രസവത്തില്‍ അഞ്ച് മുതല്‍ പത്തു കുട്ടികള്‍ വരെയുണ്ടാവും.

ജര്‍മ്മന്‍കാരനായ ഇവയെ "വര്‍ക്കിംഗ്"ഗ്രൂപ്പിലാണ് പെടുത്തിയിരിക്കുന്നത്.

64.ബോവീര്‍ ഡെസ് ഫ്ലാന്ദ്രസ് (Bouvier des Flanders)

ബോവീര്‍ ഡെസ് ഫ്ലാന്ദ്രസ് വളരെയേറെ പ്രത്യേകതകള്‍ ഉള്ള നല്ലയിനം ഹെര്‍ഡിംഗ് നായയാണ്‌.. ശരാശരിയില്‍ കവിഞ്ഞ വലിപ്പവും ആരോഗ്യവും ഉള്ള ഇവയുടെ രോമം നീണ്ടതും മിനുസം അല്ലാത്തതും ആണ്..വളരെയേറെ ബുദ്ധിയും ആരോഗ്യവും ഉള്ള ഇവയ്ക്കു തന്‍റെ സംരക്ഷണയില്‍ ഉള്ള മൃഗങ്ങളുടെ നേരെ വരുന്ന ആക്രമണം തിരിച്ചറിയാനും അവയെ രക്ഷികാനും അറിയാം..

ബെല്‍ജിയത്തില്‍ പോലീസില്‍ മാത്രമല്ല അന്ധന്മാരെ ഗൈഡ് ചെയ്തു കൊണ്ടുപോകാനും ഉപയോഗിക്കുന്ന ഇവയെ ബെല്‍ജിയംകാര്‍ക്ക് വളരെ ഇഷ്ടം ആണ്.. ഉടമയ നന്നായി അനുസരിക്കുന്ന ഇവ സ്നേഹം പിടിച്ചുപറ്റാന്‍ അറിയുന്ന ഇനം ആണ്..

ബെല്‍ജിയം കാറ്റില്‍ ഡോഗ്, കൊയ് ഹോണ്ട്,ടുഷേര്‍ ദേ ബ്യുഫ്,വ്യുല്‍ ബാര്‍ഡ്,വ്ലാംസി കൊയ്ഹോണ്ട്, ഫ്ലാന്ദ്രസ് കാറ്റില്‍ ഡോഗ് എന്നും ഇവയ്ക്കു പേരുണ്ട്..

ഇരുപത്തിഎട്ടു ഇഞ്ച് വരെ ഉയരം വരുന്ന ഇവയ്ക്കു നാല്പത്തിഅഞ്ചു വരെ കിലോ ഭാരം വയ്ക്കും,.

കാവലിനായി നല്ല ഇനമായ ഇവ രക്ഷയ്ക്കായും തങ്ങളുടെ കഴിവ് തെളിയിക്കുന്ന ഇനമാണ്.. ശാന്തന്‍ എന്ന് തോന്നുമെങ്കിലും ആക്രമിക്കാന്‍ തുടങ്ങിയാല്‍ പിടിച്ചു മാറ്റാന്‍ പ്രയാസം ആണ്..

ബുദ്ധിയുണ്ടെങ്കിലും ചിലപ്പോള്‍ ചെറിയ അനുസരണകേട്‌ കാട്ടാന്‍ സാധ്യത ഉള്ളതുകൊണ്ട് ചെറുപ്പത്തിലെ അനുസരണ പഠിപ്പിക്കണം..

പത്തുമുതല്‍ പന്ത്രണ്ട് വരെ ആയുസ്സുള്ള ഇവയുടെ ഒരു പ്രസവത്തില്‍ അഞ്ചു മുതല്‍ പത്തു കുട്ടികള്‍ വരെ ഉണ്ടാവാറുണ്ട്..

"ഹെര്‍ഡിംഗ്" ഗ്രൂപ്പിലാണ് ഇവയെ പെടുത്തിയിരിക്കുന്നത്..

63.ബോസ്ടന്‍ ടെറിയര്‍ (Boston Terrier)

അമേരിക്കയിലെ ഏറ്റവും ജനപ്രീതിയുള്ള നായകളില്‍ ഒരുവന്‍.ഇവയുടെ സ്നേഹം കാരണം പ്രായമായ ജനങ്ങളില്‍ നല്ലൊരു ശതമാനം ഇവനെ വളര്‍ത്തുന്നവരാണ്.ആരോഗ്യമുള്ള ഈ ചെറിയ നായ ബുള്‍ഡോഗിന്‍റെയും ടെറിയര്‍ നായകളുടെയും സങ്കര ഇനം ആണ്.

ഉടമയുടെ കൂടെ റോഡിലൂടെ നടന്നുപോകാനും കാറില്‍ യാത്ര ചെയ്യാനും ഇഷ്ടപ്പെടുന്ന ഇവന് മറ്റു നായകളുടെ പോലെയുള്ള മടുപ്പിക്കുന്ന ഗന്ധമോ അധികം പൊഴിയുന്ന രോമമോ ഇല്ല..

വളരെ പെട്ടെന്ന് കാര്യങ്ങള്‍ പഠിച്ചെടുക്കുന്ന ഇവ ഉടമയെ വളരെ സ്നേഹിക്കുന്നതും എപ്പോഴും ഉടമയുടെ ചുറ്റും നടക്കാന്‍ ഇഷ്ട്ടപ്പെടുന്നതുമായ ഇനമാണ്.

റൌണ്ട് ഹെടെഡ് ബുള്‍ ആന്‍ഡ് ടെറിയര്‍,ബോസ്ടന്‍ ബുള്‍,ബുള്ളെറ്റ് ഹെഡ്,റൌണ്ട് ഹെഡ്സ് എന്നും ഇവയെ വിളിക്കുന്നു,.

കുറഞ്ഞ ഭാരമുള്ളതെന്നും,ശരാശരി ഭാരമുള്ളതെന്നും,ഭാരം കൂടിയവ എന്നതും ഉള്‍പെടെ മൂന്നു വലിപ്പത്തില്‍ ഉള്ള ബോസ്ടന്‍ ടെറിയര്‍ ഉണ്ട്.. ഏതായാലും പത്തു മുതല്‍ പതിനേഴ്‌ ഇഞ്ച് വരെയേ ഉയരം വയ്ക്കൂ. നാല് മുതല്‍ പന്ത്രണ്ടു കിലോവരെ തൂക്കവും വരും.

വളരെയേറെ അനുസരണ ഉള്ള ഇവ മറ്റുകുട്ടികളോടും വീട്ടിലുള്ള കുട്ടികളോടും നന്നായി പെരുമാറും.. അപൂര്‍വ്വം സാഹചര്യത്തില്‍ ഒഴികെ മറ്റു നായകളോടും മൃഗങ്ങളോടും നന്നായി പെരുമാറും.

നന്നായി കുരയ്ക്കുന്ന ഇവയെ കാവലിനായി വളര്‍ത്താം.പക്ഷെ എല്ലാവരോടും സ്നേഹം കാട്ടുന്ന ഇവ ഒരു രക്ഷയ്ക്കായി വളര്‍ത്താവുന്ന ഇനം അല്ല..

പത്തു മുതല്‍ പതിനാലു വയസ്സ് വരെ ഇവ ജീവിക്കാറുണ്ട്.ഇവയുടെ ഒരു പ്രസവത്തില്‍ മൂന്നു മുതല്‍ നാല് കുട്ടികള്‍ വരെ ഉണ്ടാകാറുണ്ട്.. (മിക്കപ്പോഴും സിസേറിയന്‍ നടത്തേണ്ടി വരുമെന്നുള്ളതു കൊണ്ടു സാധാരണക്കാര്‍ ഇവയെ വളര്‍ത്താതിരിക്കുകയാവും ബുദ്ധി..)

62.ബോര്‍സോയി (Borzoi)

റഷ്യന്‍ വൂള്‍ഫ്ഹൗണ്ട് എന്നറിയപ്പെടുന്ന ഈ സുന്ദരന്‍ ഓട്ടത്തിനും മാന്യമായ പെരുമാറ്റത്തിനും പേരുകേട്ടവന്‍ തന്നെ.സംഘം ചേര്‍ന്നു ഓടിച്ചിരുന്ന ഈ നായയുടെ ശരീരം മെലിഞ്ഞതും ഉയരമേറിയതുമാണ്. ഇവയുടെ നീളമേറിയ രോമം നീണ്ടതോ ചുരുണ്ടതോ ഒടിവുള്ളതോ ആവാം,.

സാധാരണഗതിയില്‍ നിലത്തുവരെ എത്തുന്ന ഇവയുടെ വാല്‍ രോമം നിറഞ്ഞതാണ്‌.സാധാരണ നായകളെപോലെ കുട്ടികളോട് അത്ര ചങ്ങാത്തം കൂടുന്ന ഇനമല്ലെങ്കിലും വീട്ടിലെ മറ്റു നായകളോട് വലിയ പ്രശ്നം ഉണ്ടാക്കാറില്ല.. പൊതുവെ മാന്യനായ ഇവനെ ചെറുപ്പത്തിലെ മര്യാദ പഠിപ്പിക്കണം അല്ലെങ്കില്‍ പ്രായം ആയശേഷം പ്രശ്നകാരന്‍ എന്ന പേരും സമ്പാദിക്കാന്‍ ഇവന്‍ മടിക്കില്ല..

വളരെ പെട്ടെന്ന് വളരുന്ന ഇവയെ ഒരു വര്‍ഷം വരെ കഠിനമായ ജോലികള്‍ ചെയ്യിക്കാതിരിക്കുകയാവും നന്ന്. പൂച്ചയെ പോലെ പമ്മി നടക്കാനുള്ള ഇവയുടെ വിരുത് എടുത്ത് പറയണ്ടത് തന്നെ..അടി കൊടുത്തുള്ള പരിശീലനത്തെക്കാള്‍ വല്ലതും തിന്നാന്‍ കൊടുത്തു പരിശീലിപ്പിക്കുകയാവും ബുദ്ധി..

ഇവയെ റഷ്യയിലെ പ്രഭുക്കള്‍ മുതല്‍ പ്രശസ്തരായ അമേരിക്കന്‍ പണക്കാര്‍ വരെ വളര്‍ത്തുന്നു.. പരിചയസമ്പന്നനായ ഒരാള്‍ ആവും ഇവയെ വളര്‍ത്താന്‍ നല്ലത്..

മുപ്പത്തിരണ്ട് ഇഞ്ച് വരെ ഉയരം വയ്ക്കുന്ന ഈ റഷ്യക്കാരന്‍ നായയ്ക്ക്‌ നാല്‍പത്തിഎട്ടു കിലോവരെ ഭാരം വയ്ക്കാം,

ചെറുതെന്നോ വലുതെന്നോ നോക്കാതെ മറ്റു ജീവികളെ ഓടിക്കുന്ന ഇവയുടെ അടുത്ത് ശല്യക്കാരായ കുട്ടികളെ വിടാതെ നോക്കണം.. ചെറിയ ജീവികളെ മറ്റു വെട്ടനായകളെ പോലെ പിടിക്കുക മാത്രമല്ല കൊല്ലുകയും ചെയ്യും.

അത്രനല്ലപോലെ കുരയ്ക്കാത്ത ഇവയെ ശരാശരി കാവല്‍ നായ ആയിട്ടെ ഉപയോഗിക്കാന്‍ കഴിയൂ.. എന്നാല്‍ രക്ഷയ്ക്കായി ഇവയെ ഉപയോഗപ്പെടുത്താനും കൊള്ളില്ല..

വളരെ പിടിവാശിയും മൂശട്ടയും ഉള്ള ഇവ ആറടിയില്‍ കൂടുതല്‍ ഉയരം ചാടികടക്കും എന്നുള്ളതിനാല്‍ ഉയര്‍ന്ന മതിലോ വേലിയോ ഉണ്ടാകേണ്ടത് അത്യാവശ്യം ആണ്.. അതോടൊപ്പം തന്നെ എന്നും വ്യായാമം ആവശ്യമുള്ള ഇനം ആണ്.

പത്തു മുതല്‍ പന്ത്രണ്ടു വയസ്സുവരെ ആയുസ്സുള്ള ഇവയുടെ ഒരു പ്രസവത്തില്‍ ആറു മുതല്‍ ഏഴ് കുട്ടികള്‍ വരെ ഉണ്ടാകാറുണ്ട്.

"ഹൗണ്ട്"ഗ്രൂപ്പിലാണ് ഇവയെ പെടുത്തിയിരിക്കുന്നത്,

61.ബോര്‍ഡര്‍ ടെറിയര്‍ (Border Terrier)

വളരെ അനുസരണയുള്ള ഈ ടെറിയര്‍ സ്കോട്ട്ലണ്ടിന്‍റെയും ഇംഗ്ലണ്ട്ന്‍റെയും അതിര്‍ത്തി പ്രദേശത്ത്നിന്നാണ് വരുന്നത്.മറ്റു ടെറിയര്‍ നായകളെ പോലെ ഒരു പ്രശ്നവും ഉണ്ടാക്കാത്ത ഇവ മറ്റുനായകളോടും കുട്ടികളോടും വളരെനന്നായി ഇടപെടും.

കൊക്കെറ്റ്ഡെല്‍ ടെറിയര്‍,റീഡ് വാട്ടര്‍ ടെറിയര്‍ എന്നും ഇവയ്ക്കു പേരുണ്ട്.

പത്തിഞ്ച് മാത്രം ഉയരം വയ്ക്കുന്ന ഇവയ്ക്കു എട്ടുകിലോയില്‍ താഴെമാത്രമേ ഭാരം വയ്ക്കൂ.

അധികം നേരത്തേക്ക് തനിച്ചു വിട്ടാല്‍ ചിലപ്പോള്‍ നിലത്തു കുഴിക്കുകയും വെറുതെ നിന്നു കുരയ്ക്കുകയും ചെയ്തു എന്നും വരാം.

പരിശീലനം കൊടുത്താല്‍ ചെറിയ ഇനംമൃഗം മൃഗങ്ങളെ വേട്ടയാടാന്‍ ഇവയെ ഉപയോഗിക്കാം.കാവലിനായി ഇവയെ വളര്‍ത്താം..ആ ജോലി നന്നായി ചെയ്യും.പക്ഷെ ഇവയുടെ ഏവരോടും സ്നേഹിക്കുന്ന സ്വഭാവം കാരണം ഇവയെ ഒരു രക്ഷയ്ക്കായി ഉപയോഗിക്കുന്ന നായയായി വളര്‍ത്താന്‍ ആവില്ല..

പന്ത്രണ്ടു വയസ്സില്‍ കൂടുതല്‍ ഇവ ജീവിക്കാറുണ്ട്.. ഇവയുടെ ഒരു പ്രസവത്തില്‍ മൂന്ന് മുതല്‍ ആറ് കുട്ടികള്‍ വരെ ഉണ്ടാകാറുണ്ട്..

"ടെറിയര്‍" ഗ്രൂപ്പിലാണ് ഇവയെ പെടുത്തിയിരിക്കുന്നത്..

60.ബോര്‍ഡര്‍ കോളി (Border Collie)

അനുസരണയില്‍ ഇവനെ വെല്ലാന്‍ വേറെ ഒരു ഇനം കാണില്ല..അത്രമാത്രം ഉടമയെ അനുസരിക്കുന്ന ഒരിനമാണിത്‌.ഇടത്തരം വലിപ്പമുള്ള ഈ ഇനം എപ്പോഴും ജോലിചെയ്യാന്‍ ആഗ്രഹിക്കുന്ന നായ ആണ്..

പഠിപ്പിക്കുന്ന കാര്യങ്ങള്‍ വളരെ വേഗം പഠിക്കുകയും അത് അനുസരിക്കുകയും ചെയ്യുക ഇവയുടെ പ്രത്യേകതയാണ്.അല്പം പൊങ്ങിയ ചെവിയും ശരാശരിയില്‍ കൂടുതല്‍ നീളമുള്ള രോമങ്ങളും നീണ്ട താഴ്ത്തിയിട്ട വാലുമുള്ള ഇവ ആടിനെയോ,താറവിനെയോ,കോഴിയെ മാത്രമല്ല പശുക്കളെയും കൂട്ടത്തോട്‌ കൊണ്ടുനടക്കാന്‍ കഴിവുള്ളവയാണ്‌..

കുട്ടികള്‍ കുറെ അടുത്തുവന്നാല്‍ അവരെയും അതുപോലെ കൊണ്ടു നടന്നു എന്നിരിക്കും..

ഇരുപത്തിമൂന്നു ഇഞ്ച് വരെ ഉയരം വയ്ക്കുന്ന ഇവയ്ക്കു ഇരുപത്തിമൂന്നു കിലോവരെ തൂക്കവും വയ്ക്കും..

എന്തെങ്കിലും പരിചയമില്ലാത്തത് കണ്ടാല്‍ കുരയ്ക്കുന്ന ഇവയെ കാവലിനായി വളര്‍ത്താം എങ്കിലും രക്ഷയ്ക്ക് എന്ന ഉദ്ദേശത്തില്‍ വളര്‍ത്താന്‍ ആവില്ല..

എപ്പോഴും എന്തെങ്കിലും ചെയ്യാന്‍ ആഗ്രഹിക്കുന്ന ഈ ബ്രിട്ടീഷ്കാരനായ നായയ്ക്ക്‌ പതിനഞ്ച് വയസ്സ് വരെ ആയുസ്സുണ്ട്..ഇവയുടെ ഒരു പ്രസവത്തില്‍ ആറു മുതല്‍ എട്ടു കുട്ടികള്‍ വരെ ഉണ്ടാകാറുണ്ട്..

"ഹെര്‍ഡിംഗ്"ഗ്രൂപ്പിലാണ് ഇവയെ പെടുത്തിയിരിക്കുന്നത്.

59.ബോലോഗ്നീസ്.(Bolognese)

ബിഷോന്‍ ബോലോഗ്നീസ് എന്നും പേരുള്ള ഇവ എപ്പോഴും ഉടമയെ ചുറ്റിപറ്റി നടക്കാന്‍ ആഗ്രഹിക്കുന്ന ഇനമാണ്.. സുന്ദരനായ ഈ നായ എന്തെങ്കിലും വേലകള്‍ കാട്ടി ഉടമയെ കൈയിലെടുക്കാന്‍ വിരുതനാണ്..പലപ്പോഴും ഈ ഗുണങ്ങള്‍ കൊണ്ടു തന്നെ ഇവയെ സര്‍ക്കസില്‍ ഉപയോഗിക്കുന്നു..

എല്ലാവരോടും മാന്യമായെ ഇവന്‍ പെരുമാറൂ..ഇവയേക്കാള്‍ ബുദ്ധിയുള്ള ഇനങ്ങള്‍ ഉണ്ടോ എന്ന് പോലും സംശയം തോന്നുന്ന ഇനം ആണെങ്കിലും മുതിര്‍ന്ന നായ പോലും ചിലപ്പോള്‍ പട്ടിക്കുട്ടികളെ പോലെ പെരുമാറുകയും ചെയ്യാറുണ്ട്..

ഒരടി വരെ മാത്രം ഉയരം വയ്ക്കുന്ന ഇവ ഏഴ് കിലോ വരെ ഭാരവും വയ്ക്കാറുണ്ട്..

എന്തെങ്കിലും പ്രത്യേകതയുള്ളതോ പരിചയമില്ലാത്തതോ കണ്ടാല്‍ കുരയ്ക്കുന്ന ഇവയെ കാവലിനായി നന്നായി ഉപയോഗിക്കാമെങ്കിലും ആരെയും ആക്രമിക്കാത്ത ഇവയെ രക്ഷയ്ക്കായി വളര്‍ത്താന്‍ ആവില്ല.

ഇറ്റലിക്കാരനായ ഇവയ്ക്കു പതിനഞ്ച് വയസ്സ് വരെ ആയുസ്സുള്ളവയാണ്.

ഇവയുടെ ഒരു പ്രസവത്തില്‍ മൂന്നു മുതല്‍ ഏഴ് കുട്ടികള്‍ ഉണ്ടാവാറുണ്ട്.

58.ബോഗ്ലെന്‍ ടെറിയര്‍(Boglen Terrier)

ഇവ ബോസ്ടന്‍ ടെറിയര്‍ ബീഗിള്‍ എന്നിവയുടെ സങ്കര ഇനം ആണ്..അതീവ ബുദ്ധിശാലിയായ ഇവയ്ക്കു വളരെ എളുപ്പം ട്രെയിനിംഗ് കൊടുക്കാന്‍ കഴിയും.കുട്ടികളോട് വളരെ നന്നായി പെരുമാറാനും ഇവയ്ക്കു കഴിവുണ്ട്.

പതിനേഴ്‌ ഇഞ്ച് വരെ ഉയരം വയ്ക്കുന്ന ഇവയ്ക്കു പതിനാലു കിലോവരെ ഭാരവും വയ്ക്കും..

മറ്റു നായകളോട് കുഴപ്പമില്ലാതെ പെരുമാറുന്ന ഇവയെ കാവലിനോ രക്ഷയ്ക്കയോ വളര്‍ത്താന്‍ ആവില്ല..

57.ബ്ലുടിക്ക് കൂണ്‍ഹൗണ്ട് (Bluetik Coonhound)

ബ്ലൂ ടെ ഗസ്കോന്‍ എന്നും പേരുള്ള ഇവ വളരെ ശാന്തനായ ഇനം ആണെങ്കിലും അനുസരണക്കെടും കാട്ടാറുണ്ട്‌.. വളരെ ചെറുപ്പത്തിലെ പരിശീലനം കൊടുത്തു ഈ സ്വഭാവം മാറ്റിയില്ലെങ്കില്‍ പിന്നീട് ഇതു മാറ്റുക അസംഭവ്യം ആകും.

ചിലപ്പോഴൊക്കെ ചെറിയ മൃഗങ്ങളെ ഓടിക്കും എന്നാലും പൊതുവെ മനുഷ്യനോടോ മറ്റു നായകളോടോ പ്രശ്നം ഉണ്ടാക്കാറില്ല.റാകൂണുകളെ വേട്ടയാടാന്‍ ആണിവയെ പൊതുവെ വളര്‍ത്തുന്നത്, റാകൂണുകളെ ഓടിച്ചു മരത്തില്‍ കയറ്റി ഉടമയ്ക്ക് അവയെ വെടിവെച്ചു കൊല്ലാന്‍ അവസരം ഉണ്ടാക്കുകയാണ് ഇവയുടെ പ്രധാന പണി.. രാക്കൂണ്‍ അല്ലാതെ ആരോടും പ്രകോപനപരമായി ഇവ പെരുമാറില്ല..

ഇരുപത്തിഏഴ് ഇഞ്ച് ഉയരംവയ്ക്കുന്ന ഇവ നാല്‍പതുകിലോവരെ ഭാരം വയ്ക്കുന്നവയാണ്..

കാവലിനു ശരാശരി മാത്രം ഉപയോഗിക്കുവാന്‍ കഴിയുന്ന ഇവ രക്ഷയ്ക്കായി വളരെ മോശം ഇനമാണ്..

അമേരിക്കക്കാരനായ ഇവയ്ക്കു പന്ത്രണ്ടു വയസ്സുവരെ ആയുസ്സുണ്ട്.

"ഹൗണ്ട്" ഗ്രൂപ്പിലാണ് ഇവയെ പെടുത്തിയിരിക്കുന്നത്..

56.ബ്ലഡ് ഹൗണ്ട്(Blood Hound)

ചുക്കി ചുളിഞ്ഞ മുഖമുള്ള ശക്തനായ ഈ ഇനം വളരെ നന്നായി എല്ലാവരോടും പെരുമാറും എന്നതുമാത്രമല്ല വളരെ ശാന്തനായി വീട്ടില്‍ കിടക്കുമെന്നതും ഒരു പ്രത്യേകതയാണ്. പൊതുവെ വൃത്തിയുള്ള ഇനമായ ഇവ മിക്കപ്പോഴും വീട്ടിനുള്ളില്‍ ഉമിനീര്‍ ഒലിപ്പിക്കും എന്നതൊഴിച്ചാല്‍ യാതൊരു പ്രശ്നവും ഉണ്ടാക്കാറില്ല.

മണം പിടിക്കാനുക്കാനുള്ള ഇവയുടെ അസാധാരണമായ ശേഷിമൂലം ഇവയെ ലോകത്തിന്‍റെ പലഭാഗത്തും പോലീസിലും പട്ടാളത്തിലും ഉപയോഗിക്കാറുണ്ട്..മണം പിടിച്ചു ഇരയെ കണ്ടെത്തിയാല്‍ അവയെ ആക്രമിക്കില്ല എന്നത് പോലീസില്‍ ഇവയെ ഉപയോഗിക്കാന്‍ മറ്റൊരു പ്രധാന കാരണം കൂടിയാവുന്നു..

വീടിനു വെളിയില്‍ ഒരു പക്ഷെ ചാടിമറിയുമെങ്കിലും വീടിനുള്ളില്‍ വളരെ ശാന്തനായി മാത്രമെ പെരുമാറൂ.. മനുഷ്യന്‍റെ നാപ്പതു ഇരട്ടി മണം പിടിക്കാനുള്ള കഴിവ് ഈയിനത്തിനുണ്ട്..

സെന്‍റ്.ഹുബര്‍ട്ട്സ് ഹൗണ്ട്, ചിയെന്‍ ടെ സൈന്റ് ഹുബര്‍ട്ട്സ് എന്നും ഇവയ്ക്കു പേരുണ്ട്.

ഇരുപത്തിഏഴ് ഇഞ്ച് വരെ ഉയരംവയ്ക്കുന്ന ഇവയ്ക്കു അമ്പത് കിലോ വരെ തൂക്കവും വയ്ക്കാറുണ്ട്.

ചിലപ്പോള്‍ പരിശീലനം അല്പം പ്രയാസം ആവും..ലോകത്തില്‍ മണം പിടിക്കാന്‍ ഏറ്റവും നല്ല ഇനമായ ഇവയെ മണം പിടിച്ചു പോകുന്നതില്‍ നിന്നു തിരികെ വിളിച്ചാല്‍ ചിലപ്പോള്‍ തിരികെ വരാതെ മണത്തിനു പിന്നാലെ പോകും എന്നൊരു പ്രശ്നവും ഉണ്ട്.. പൊതുവെ വീടിനുള്ളില്‍ അനുസരണകാരനായഇവ വീടിനു വെളിയില്‍ അല്പം അനുസരണക്കേട്‌ കാട്ടുന്ന സ്വഭാവം ഉണ്ട്.

പട്ടികളോടും കുട്ടികളോടും വളരെ മാന്യമായി ഇടപെടുന്ന ഇനമാണിവ..കാവലിനു പറ്റിയ ഇനം ആണെങ്കിലും രക്ഷയ്ക്കായി ഏറ്റവും മോശമായ ഇനമാണിവ..മൂശട്ടക്കാരനായ ഇവ അനുസരണക്കെടിനു പേരുകേട്ട ഇനമാണ്..അതുകൊണ്ട് തന്നെ ട്രൈയിനിംഗ് കൊടുക്കല്‍ അല്പം ദുഷ്കരം ആവും.

പതിനൊന്നു വയസ്സുവരെ ആയുസ്സുള്ള ഇവയുടെ ഒരു പ്രസവത്തില്‍ ഏഴ് മുതല്‍ എട്ടു കുട്ടികള്‍ വരെ ഉണ്ടായേക്കാം.

ബെല്‍ജിയം കാരനായ ഇവനെ "ഹൗണ്ട്"ഗ്രൂപ്പിലാണ് പെടുത്തിയിരിക്കുന്നത്.

55.ബ്ലാക്ക് റഷ്യന്‍ ടെറിയര്‍ (Black Russian Terrier )

നാല് ഇഞ്ചോളം നീളമുള്ള രോമത്തോട് കൂടിയ ഈ വലിയ നായ റഷ്യക്കാര്‍ തങ്ങളുടെ അഭിമാനമായാണ് കാണുന്നത്..ധാരാളം ഇത്തരത്തിലുള്ള നായകള്‍ റഷ്യന്‍ പട്ടാളത്തില്‍ സേവനം ചെയ്യുന്നു.. അമേരിക്കയിലും ഇത്തരം നായകള്‍ ഉണ്ടെങ്കിലും ഇപ്പോള്‍ റഷ്യക്ക് വെളിയിലേക്ക് ഈ ഇനത്തെ കയറ്റുമതി ചെയ്യുന്നത് നിരോധിച്ചിരിക്കുകയാണ്.

എന്തുതരം ജോലിയ്ക്കും ഇവയെ ഉപയോഗിക്കാം എന്നതാണ് ഇവയുടെ പ്രത്യേകത.. ഏത് ജോലിയും വളരെ ഭംഗിയോടെ ചെയ്യാനും ഇവയ്ക്കാവും..

ബ്ലാകീസ്‌,ചോര്‍നി ടെറിയര്‍, ടെറിയര്‍ നോയിര്‍ ടുസ്സ്,രസ്കജി ചോര്‍നി ടെറിയര്‍ എന്നും ഇവയ്ക്കു പേരുണ്ട്..

മുപ്പതു ഇഞ്ച് ഉയരം വയ്ക്കുള്ള വലിയ നായയ്ക്ക്‌ അറുപത്തിആറ് കിലോവരെ ഭാരം വയ്ക്കും..

കുട്ടികളോട് വളരെ നന്നായി പെരുമാറുന്ന ഇവ കുട്ടികളെ ആരെങ്കിലും ഉപദ്രവിച്ചാല്‍ അവരെ ആക്രമിക്കുകയും ചെയ്യും.വീട്ടിലെ നായകളോടോ മറ്റു മൃഗങ്ങളോടോ നന്നായി പെരുമാറും എങ്കിലും മറ്റുള്ളവയോടെ അത്ര നന്നായി പെരുമാറി കൊള്ളണം എന്നില്ല..

കാവലിനായോ രക്ഷയ്ക്കയോ ഇവയെ വളര്‍ത്തിക്കോളൂ..രണ്ടിനും വളരെ നന്നായി ഉപയോഗപ്പെടുത്താനാവും..

നല്ല അനുസരണയും,കഴിവും,ബുദ്ധിയും ഉള്ള ഇവയെ നന്നായി പരിശീലിപ്പിച്ചാല്‍ വളരെ നല്ല കൂട്ടുകാരനായി മാറ്റാം.

പതിനാലു വയസ്സ് വരെ ആയുസ്സുള്ള ഇവയുടെ ഒരു പ്രസവത്തില്‍ ആറ് മുതല്‍ പന്ത്രണ്ടു കുട്ടികള്‍ വരെ ഉണ്ടാകാറുണ്ട്.

54.ബ്ലാക്ക് ആന്‍ഡ് ടാന്‍ കൂന്‍ഹൗണ്ട്(Black and Tan Coon Hound)

ഏറ്റവും മികച്ച വെട്ടനായകളില്‍ ഒന്നായ കൂന്‍ഹൗണ്ട് പൊതുവെ റാകൂന്‍,കരടി,കാട്ടുപൂച്ച ഇവയുടെ നായട്ടിനായാണ് സാധാരണ ഗതിയില്‍ തന്‍റെ പ്രാഗത്ഭ്യം കാണിക്കുന്നത്.രാത്രിയില്‍ സഞ്ചരിക്കുന്ന ജീവികളെ മണം പിടിച്ചു കണ്ടെത്തുകയാണ് ഇവയുടെ രീതി.

ഇവയുടെ മണം പിടിക്കാനുള്ള കഴിവ് അസാധാരണം ആണ്.പൊതുവെ എല്ലാവരോടും നന്നായി ഇടപെടാന്‍ മിടുക്കനാണ്.ഇവയെ ആരും ഡോഗ് ഷോയ്ക്ക് വേണ്ടി വളര്‍ത്താറില്ല.. ചിലപ്പോള്‍ വളരെ ഉച്ചത്തില്‍ ഒരിയിടാരുണ്ട്..എന്തെങ്കിലും ഇരയെ കണ്ടാല്‍ ഒരിയിടുന്നത് വേറെ ശബ്ത്തില്‍ ആണ്.. നല്ല ഉടമയ്ക്ക് അത് രണ്ടും തിരിച്ചറിയാന്‍ കഴിവുണ്ടാകണം..

പക്ഷെ ഇടയ്ക്കിടെ ഓരോ ജീവികളുടെ മണം പിടിച്ചു ഒരിയിടുന്നത് ചിലപ്പോള്‍ വീട്ടില്‍ താമസിക്കുന്നവര്‍ക്കും അയല്‍വാസികള്‍ക്കും അല്പം ബുദ്ധിമുട്ടുണ്ടാക്കും..

അമേരിക്കന്‍ ബ്ലാക്ക് ആന്‍ഡ് ടാന്‍ കൂന്‍ഹൗണ്ട് എന്നും ഇവയ്ക്കു പേരുണ്ട്.

ഇരുപത്തിഏഴ് ഇഞ്ച് വരെ ഉയരം വയ്ക്കുന്ന ഇവയ്ക്കു മുപ്പത്തിഏഴ് കിലോ വരെ ഭാരവും ഉണ്ടാകാറുണ്ട്.

അല്പം സൌമ്യനായത് കൊണ്ടു രക്ഷയ്ക്കായി വളര്‍ത്താന്‍ പറ്റിയ ഇനമല്ലെങ്കിലും കാവലിനു പറ്റിയ ഇനം ആണ്..

ഒരു നല്ല വേട്ടക്കാരന് പറ്റിയ ഇനമായ ഇവയെ വെറുതെ വളര്‍ത്തുവാന്‍ ആഗ്രഹിക്കുന്നവര്‍ക്ക് ചേരുന്ന ഇനമല്ല..

പന്ത്രണ്ടു വയസ്സ് വരെ ആയുസ്സുള്ള ഇവയുടെ ഒരു പ്രസവത്തില്‍ ഏഴുമുതല്‍ എട്ടു കുട്ടികള്‍ ഉണ്ടാവാറുണ്ട്.

"ഹൗണ്ട് " ഗ്രൂപ്പിലാണ് ഇവയെ പെടുത്തിയിരിക്കുന്നത്..

53.ബ്യുവര്‍ (Biewer)

ചെറിയ കളിപ്പാട്ടം പോലുള്ള ഈ സുന്ദരക്കുട്ടപ്പന്‍ ആദ്യനോട്ടത്തില്‍ തന്നെ ആരുടേയും മനം കവരും.നിലത്തുവരെയെത്തുന്ന നീളന്‍ പട്ടുപോലുള്ള രോമം ഇവയുടെ പ്രത്യേകതയാണ്.

ബ്യുവര്‍ യോര്‍ക്ക്ഷയര്‍ എ ല പോം പൊന്‍, ബ്യുവര്‍ യോര്‍കി,ബ്യുവര്‍ യോര്‍ക്ക്ഷയര്‍ ടെറിയര്‍ എന്നും ഇവയ്ക്കു പേരുണ്ട്.

എട്ടര ഇഞ്ചുമാത്രം ഉയരം വയ്ക്കുന്ന ഇവന് നാലുകിലോ വരെ മാത്രമെ ഭാരം വയ്ക്കൂ..

ചെറിയവന്‍ ആണെങ്കിലും കുട്ടികളെയും മറ്റു പട്ടികളെയും അടുത്ത് വിടുമ്പോള്‍ അല്പം ശ്രദ്ധിക്കുക..ചിലപ്പോള്‍ ആക്രമണ സ്വഭാവവും ഉള്ളവനാണ്..

കാവലിനായി മിടുക്കനാണെങ്കിലും രക്ഷയ്ക്കായി അത്രപോര..പക്ഷെ കുഞ്ഞനാണെങ്കിലും തന്നാലാവും വിധം ആ ജോലിയും അവന്‍ ചെയ്യും..അല്ലാതെ ഉശിരിനു ഒട്ടും കുറവുള്ള ഇനമല്ല..


എന്നും വ്യായാമം വേണ്ട ഇവനെ ഗ്രാമത്തിലോ പട്ടണത്തിലോ വളര്‍ത്താം..
അല്പം മൂശട്ടയായ ഇവനെ പഠിപ്പിക്കുമ്പോള്‍ അല്പം ശ്രദ്ധ വേണ്ടിവരും.

ജര്‍മ്മന്‍കാരനായ ഇവന്‍ പതിനഞ്ച് വയസ്സ് വരെ ആയുസ്സുള്ളവന്‍ ആണ്.ഇവയുടെ ഒരു പ്രസവത്തില്‍ രണ്ടു മുതല്‍ അഞ്ചു കുട്ടികള്‍ വരെ ഉണ്ടാകാറുണ്ട്..

52.ബിഷ്-പൂ (Bich Poo)

ബിഷ് പൂ എന്നും പൂഷോന്‍ എന്നും വിളിക്കുന്ന ഇവ പൂഡില്‍,ബിഷോന്‍ ഫ്രീസ് എന്നിവയുടെ സങ്കര ഇനം ആണ്.

പൂഡിലിന്‍റെ രോമം പൊഴിയാത്ത ഗുണവും ബിഷോന്‍ ഫ്രീസിന്‍റെ മാന്യമായ സ്വഭാവവും ഉള്ള ഇവ ഒരു ഹൈബ്രിഡ് സങ്കരഇനം ആണ്..

51.ബീഷോന്‍ ഫ്രീസ്(Bichon Frise)

വളരെ മാന്യനായ ഒരു ചെറിയ നായ.ഇവയുടെ രോമം വളര്‍ന്നു തൂങ്ങിക്കിടക്കുന്ന തരത്തില്‍ അല്ല..കണ്ടാല്‍ ഒരു പഞ്ഞിക്കെട്ടെന്നു തോന്നിക്കുന്ന ഇനം നായആയ ഇവ നമ്മുടെ ശ്രദ്ധക്ഷണിക്കാന്‍ എന്തഭ്യസവും കാട്ടും.ഈ ഗുണം കൊണ്ടുതന്നെ ഇവയെ സര്‍ക്കസില്‍ ഉപയോഗിച്ചു വരുന്നു..

കുട്ടികളെന്നോ വലിയവരെന്നോ ഇല്ലാതെ എല്ലാവരോടും വളരെ മാന്യമായി മാത്രമെ ഈയിനം പെരുമാറൂ.ഇവയുടെ വാലോ ചെവിയോ രോമത്തിനു വെളിയില്‍ കാണാന്‍ പോലും കിട്ടില്ല..സാധാരണ നീളന്‍ വെള്ള രോമം ഉള്ളനായകള്‍ക്ക് വരുന്നു യാതൊരു ത്വക്ക്,രോമ അസുഖങ്ങളും ഇവയെ ബാധിക്കാറില്ല..

ടെനെറിഫ് ബിഷോന്‍,ടെനെറിഫ് ഡോഗ്,ബിഷോന്‍ ടെനെറിഫ്, ബിഷോന്‍ എ പോയില്‍ ഫ്രീസ് എന്നും ഇവയ്ക്കു പേരുണ്ട്.

പതിനാറു ഇഞ്ച് വരെ ഉയരം വയ്ക്കുന്ന ഇവയ്ക്കു എട്ടുകിലോ വരെ ഭാരവും വയ്ക്കും..

കുട്ടികളോടും വീട്ടിലുള്ള മറ്റു നായകളോടും മൃഗങ്ങളോടും കളിയ്ക്കാന്‍ ഇഷ്ടപ്പെടുന്ന ഇവ വീട്ടില്‍ വളര്‍ത്താന്‍ ഏറ്റവും നല്ല നായകളില്‍ ഒന്നാണ്.

ആരെയെങ്കിലും കണ്ടാല്‍ പെട്ടെന്ന് കുരയ്ക്കുന്ന ഇവ നല്ലൊരു കാവല്‍ നായ ആണെങ്കിലും എല്ലാവരോടും കളിയ്ക്കാന്‍ മാത്രം ഇഷ്ടം കാണിക്കുന്നത് കൊണ്ടും ചെറിയ ഇനം ആയതുകൊണ്ടും രക്ഷക്കായി വളര്‍ത്താനാവില്ല..

ഫ്രഞ്ച്കാരനായ ഈ നായ കാര്യങ്ങള്‍ വളരെ വേഗം പഠിയ്ക്കുന്ന കൂട്ടത്തിലാണ്.പൊതുവെ ഒരു ആരോഗ്യ പ്രശ്നങ്ങളും ഇല്ലാത്ത ഇവ പതിനാറു വയസ്സ് വരെ സാധാരണഗതിയില്‍ ജീവിച്ചിരിക്കും..ഒരു പ്രസവത്തില്‍ ഇവയ്ക്കു മൂന്നു മുതല്‍ അഞ്ചു കുട്ടികള്‍ വരെ ഉണ്ടാവാറുണ്ട്.

"നോണ്‍ സ്പോര്‍ട്ടിംഗ് " ഗ്രൂപ്പിലാണ് ഇവയെ പെടുത്തിയിരിക്കുന്നത്..

50.ബെര്‍ണീസ് മൌണ്ടെന്‍ ഡോഗ് (Bernese Mountain Dog)

ഇവ സ്വിസ് വംശജനാണ്.മൂന്നു കളര്‍ ഉള്ള രോമത്തോട് കൂടി വളരുന്ന ഇവ തണുപ്പ് പ്രദേശത്തിന് മാത്രം ചേരുന്ന ഇനം ആണ്..വളരെ വലിയ നായകളില്‍ ഒന്നായ ഇവ ചൂടും ഈര്‍പ്പം നിറഞ്ഞതുമായ കാലാവസ്ഥയ്ക്ക് ചേര്‍ന്ന ഇനമല്ല..പൊതുവെ നന്നായി പെരുമാറുന്ന ഇവയെ ഗ്രാമത്തില്‍ മാത്രമല്ല പട്ടണത്തിലും വളര്‍ത്താം..

പക്ഷെ ഇവയെ ഒരാള്‍ മാത്രം വളര്‍ത്തുന്നതാവും ഉത്തമം..അല്പം പ്രായമായ ശേഷം വേറെ ഒരാളെ അനുസരിക്കാന്‍ അല്പം വിമുഖത ഇവ കാട്ടാറുണ്ട്‌..വീടിനോടും വീട്ടുകാരോടും കൂറുള്ള ഇവ അത്യാവശ്യം ഓടാനും ചാടാനുമുള്ള സ്ഥലം ആവശ്യമുള്ള ഇനമാണ്..

ബര്‍ണര്‍ സെന്നേന്‍ ഹൗണ്ട്,ബെര്‍ണീസ് കാറ്റില്‍ ഡോഗ്,ബോവിര്‍ ബെര്‍ണോയിസ് എന്നും ഇവയ്ക്ക് പേരുണ്ട്..

ഇരുപത്തിഏഴര ഇഞ്ച് വരെ ഉയരം വയ്ക്കുന്ന ഇവ നാല്‍പത്തിഎട്ടുകിലോ വരെ ഭാരംവയ്ക്കുന്ന ഇനമാണ്.

കുട്ടികളെ ഇഷ്ടമുള്ളവ ആണെങ്കിലും അറിയാതെ കുട്ടികളെ തട്ടിയിടും എന്നതുകൊണ്ട് അല്പം സൂക്ഷിക്കണം.

കാവലിനായി വളര്‍ത്തുന്ന ഇവ ആകാര്യത്തില്‍ വളരെ സമര്‍ത്ഥനാണ്..രക്ഷയ്ക്ക് ശരാശരി മുതല്‍ നല്ല മിടുക്കുവരെ കാട്ടാറുണ്ട്‌..

നല്ല അനുസരണയും ബുദ്ധി ശക്തിയും ഉള്ള ഇവയ്ക്ക് വ്യായാമം അത്യാവശ്യമാണ്..അതോടൊപ്പം ഇവയുടെ രോമം പൊഴിയുന്നത് കൊണ്ടു ഇടയ്ക്കിടെ ചീകി കൊടുക്കണം..

പത്തു വയസ്സ് വരെ ആയുസുള്ള ഇവയുടെ ഒരു പ്രസവത്തില്‍ നാലുമുതല്‍ പത്തു വരെ കുട്ടികള്‍ ഉണ്ടാകാറുണ്ട്..

"വര്‍ക്കിംഗ്" ഗ്രൂപ്പിലാണ് ഇവയെ പെടുത്തിയിരിക്കുന്നത്,

49.ബെര്‍ജേര്‍ പികാര്‍ഡ് (Berger Picard)

ഈ ഫ്രഞ്ച്കാരന്‍ നായയെ ഫ്രാന്‍സില്‍ വിളിക്കുന്നത് ബെയര്‍-സെ-പീ-കാര്‍ എന്നാണ്.. പിക്കാര്‍ഡി ഷെപ്പെട് എന്നറിയപ്പെടുന്ന ഇവ വളരെ അപൂര്‍വമായ ഇനം ആണ്.അമേരിക്കയിലും ചിലയിടത്ത് വളര്‍ത്തുന്ന ഇവ വളരെ കളിക്കാനും ജോലിചെയ്യാനും ഇഷ്ടപ്പെടുന്ന ഇനം ആണ്..പക്ഷെ കളിക്കാന്‍ തുടങ്ങിയാല്‍ ചിലപ്പോള്‍ ഒരു ഗുണ്ടയെ പോലെ ദേഹോപദ്രവം ഏല്‍പ്പിച്ചു എന്ന് വരും.

ഗ്രാമത്തില്‍ താമസിക്കുന്ന പരിചയസമ്പന്നനായ ഒരാളാവും ഇവയെ വളര്‍ത്താന്‍ നല്ലത്.. ഇവയുടെ കുരവളരെ എടുപ്പുള്ളതാണ്..

ഇരുപത്താറു ഇഞ്ച് വരെ ഉയരം വയ്ക്കുന്ന ഇവയ്ക്ക് മുപ്പത്തിരണ്ടു കിലോവരെ തൂക്കവും വയ്ക്കാറുണ്ട്..

കൂര്‍ത്ത ചെവിയുള്ള ഇവയുടെ രോമം ഏത് കാലവസ്ഥയെം ചെറുക്കാനുള്ള കഴിവുള്ളവയാണ്‌.വളരെപ്പെട്ടെന്നു കാര്യങ്ങള്‍ കാര്യങ്ങള്‍ പഠിയ്ക്കാന്‍ കഴിവുള്ള ഇവയ്ക്ക് വളരെ വ്യായാമം ആവശ്യമാണ്‌.

കാവലിനായും രക്ഷയ്ക്കായും വളര്‍ത്താമെങ്കിലും രണ്ടിലും ശരാശരി മിടുക്കെ ഇവയ്ക്ക്കാണൂ.

പൊതുവെ ആരോഗ്യശാലിയായ ഇവ പതിനാലുവയസ്സ് വരെ ജീവിച്ചിരിക്കാറുണ്ട്.

48.ബെര്‍ഗാമാസ്കോ (Bergamasco)

വളരെ വെത്യേസ്തനായ ഈ ഇറ്റാലിയന്‍ നായ ഇറ്റലിയില്‍ അല്ലാതെ പുറമെ വളരെ അപൂര്‍വമായി മാത്രമെ കാണപ്പെടുന്നുള്ളൂ.സത്യത്തില്‍ ഇറ്റലിയില്‍ പോലും ഇവയുടെ വംശം കുറവാണ്.വളരെ നീണ്ട ഇവയുടെ രോമം ജടപിടിക്കുകയാണ് പതിവ്..

പക്ഷെ ഇവ മനുഷ്യരില്‍ അലെര്‍ജി ഉണ്ടാക്കുന്നില്ല..ധൈര്യശാലിയാ ഇവന്‍ പൊതുവെ ആട്ടിന്‍പറ്റങ്ങളെ നോക്കാനാണ് ഉപയോഗപ്പെടുന്നത്..

ഇരുപത്തിഅഞ്ചര ഇഞ്ച് വരെ ഉയരം വയ്ക്കുന്ന ഇവയ്ക്കു മുപ്പത്തിഒമ്പത് കിലോവരെ തൂക്കം വയ്ക്കും..

വളരെ കട്ടിയുള്ള ഇവയുടെ ജടയില്‍ മറ്റു നായകള്‍ കടിച്ചാലും സാധാരണ ഇവയ്ക്കൊന്നും പറ്റില്ല..കാവലിനായോ രക്ഷയ്ക്കായോ ശരാശരി മാത്രം ഉപയോഗപ്പെടുത്താവുന്ന ഇനം ആണ്.ഒരിക്കലും ഭയപ്പെടുത്തി ഇവയെ അനുസരിപ്പിക്കാന്‍ കഴിയില്ല..ഒരു സുഹൃത്തായി മയത്തില്‍ പറയുകയേ നിവൃത്തിയുള്ളൂ.

പൊതുവെ അസുഖങ്ങള്‍ ഒന്നും വരാത്ത ഇവ സാധാരണ ഗതിയില്‍ പതിനഞ്ച് വയസ്സ് വരെ ജീവിക്കുന്നവയാണ്.ഇവയുടെ ഒരു പ്രസവത്തില്‍ ആറുമുതല്‍ പത്തു കുട്ടികള്‍ വരെ ഉണ്ടാവുറുണ്ട്.

"ഹെര്‍ഡിംഗ്" ഗ്രൂപ്പിലാണ് ഇവയെ പെടുത്തിയിരിക്കുന്നത്..

47.ബെല്‍ജിയന്‍ ടെര്‍വുറെന്‍ (Belgian Tervuren)

ഈ ഇനവും ബെല്‍ജിയന്‍ ഷീപ്പ് ഡോഗും തമ്മിലുള്ള വെത്യാസം ഇവയുടെ ചെമ്പന്‍ നിറം മാത്രമാണ്.ടെര്‍വുറെന്‍ എന്നും ഇവയ്ക്കു പേരുണ്ട്..

ഇടത്തരം വലിപ്പമുള്ള നന്നായി ഓടാനും,താന്‍ നോക്കുന്ന ആട്ടിന്‍ പറ്റത്തെ രക്ഷിക്കാനും ഇവ അതീവ സമര്‍ത്ഥന്‍ ആണ്,പൊതുവെ എല്ലാവരെയും അടുപ്പിക്കുന്ന ഇനം അല്ലെങ്കിലും സ്വന്തം വീട്ടിലുള്ളവരുടെ രക്ഷയ്ക്ക് ജീവന്‍ കൊടുക്കാന്‍ തയ്യാറുള്ള ഇനം ആണ്.ഒരാളെ മാത്രമെ അനുസരിക്കൂ എന്ന നിര്‍ബന്ധ ബുദ്ധിയുള്ള ഇവയെ അല്പം പരിചയ സമ്പന്നനായ ഒരാള്‍ വളര്‍ത്തുന്നതാവും ബുദ്ധി..

ഇരുപത്താറു ഇഞ്ച് വരെ ഉയരം വയ്ക്കുന്ന ഇവയ്ക്കു ഇരുപത്തിഒമ്പത് കിലോവരെ ഭാരം വയ്ക്കും..

ഉടമയുടെ വിശ്വസ്തനും,ഉടമയുടെ കൂടെ ഇരിക്കാന്‍ ഇഷ്ടപ്പെടുന്നവനുമായ ഇവ ഉടമ കൊടുക്കുന്ന ജോലി ചെയ്യാന്‍ തയ്യാറുള്ളവാനാണ്. പക്ഷെ കൂടുതല്‍ നേരം ആരും ഇവന്‍റെ അടുത്തില്ലെങ്കില്‍ ശ്രദ്ധ കിട്ടാന്‍ കുസൃതികള്‍ കാട്ടാനും ഇവ മടിയ്ക്കാറില്ല..കുട്ടികളെയും മറ്റു ജീവികളെയും അടുപ്പിക്കുമ്പോള്‍ അല്പം ശ്രദ്ധിക്കണം..

രക്ഷയ്ക്കും കാവലിനായും വളര്‍ത്താന്‍ മികച്ച ഇനം ആണ്.ചെറുപ്പത്തിലേ ഇവയെ പരിശീലിപ്പിക്കുക..

പതിനാലു വയസ്സ് വരെ ആയുസ്സുള്ള ഇവയുടെ ഒരു പ്രസവത്തില്‍ ആറു മുതല്‍ പത്തു കുട്ടികള്‍ വരെ ഉണ്ടാവാറുണ്ട്.

"ഹെര്‍ഡിംഗ്" ഗ്രൂപ്പിലാണ് ഇവയെ പെടുത്തിയിരിക്കുന്നത്..

46.ബെല്‍ജിയന്‍ ഷീപ്പ്ഡോഗ് (Belgian sheepdog)

ബെല്‍ജിയന്‍ ഇനങ്ങളില്‍ ഏറ്റവും ജനപ്രിയനായ ഇനമാണ് ഇവന്‍.സൌന്ദര്യം വേണ്ടുവോളം ഉള്ള ഇവന്‍റെ രോമം വളരെ നീളമേറിയതാണ്.

ഗ്രോനിന്‍ ഡെല്‍ എന്ന് പേരുള്ള ഇവയെ ചിയെന്‍ ദേ ബെര്‍ജേര്‍ ബെല്‍ഗേ എന്നും വിളിക്കും.

ഇടത്തരം വലിപ്പമുള്ള ഇവ പൊതുവെ കറുപ്പ് നിറമുള്ളവയാണ്‌. നന്നായി ഓടാനും,താന്‍ നോക്കുന്ന ആട്ടിന്‍ പറ്റത്തെ രക്ഷിക്കാനും ഇവ അതീവ സമര്‍ത്ഥന്‍ ആണ്,പൊതുവെ എല്ലാവരെയും അടുപ്പിക്കുന്ന ഇനം അല്ലെങ്കിലും സ്വന്തം വീട്ടിലുള്ളവരുടെ രക്ഷയ്ക്ക് ജീവന്‍ കൊടുക്കാന്‍ തയ്യാറുള്ള ഇനം ആണ്.ഒരാളെ മാത്രമെ അനുസരിക്കൂ എന്ന നിര്‍ബന്ധ ബുദ്ധിയുള്ള ഇവയെ അല്പം പരിചയ സമ്പന്നനായ ഒരാള്‍ വളര്‍ത്തുന്നതാവും ബുദ്ധി..

ഇരുപത്താറു ഇഞ്ച് വരെ ഉയരം വയ്ക്കുന്ന ഇവയ്ക്കു ഇരുപത്തിഒമ്പത് കിലോവരെ ഭാരം വയ്ക്കും..

ഉടമയുടെ വിശ്വസ്തനും,ഉടമയുടെ കൂടെ ഇരിക്കാന്‍ ഇഷ്ടപ്പെടുന്നവനുമായ ഇവ ഉടമ കൊടുക്കുന്ന ജോലി ചെയ്യാന്‍ തയ്യാറുള്ളവാനാണ്. പക്ഷെ കൂടുതല്‍ നേരം ആരും ഇവന്‍റെ അടുത്തില്ലെങ്കില്‍ ശ്രദ്ധ കിട്ടാന്‍ കുസൃതികള്‍ കാട്ടാനും ഇവ മടിയ്ക്കാറില്ല..കുട്ടികളെയും മറ്റു ജീവികളെയും അടുപ്പിക്കുമ്പോള്‍ അല്പം ശ്രദ്ധിക്കണം..

രക്ഷയ്ക്കും കാവലിനായും വളര്‍ത്താന്‍ മികച്ച ഇനം ആണ്.ചെറുപ്പത്തിലേ ഇവയെ പരിശീലിപ്പിക്കുക..

പതിനാലു വയസ്സ് വരെ ആയുസ്സുള്ള ഇവയുടെ ഒരു പ്രസവത്തില്‍ ആറു മുതല്‍ പത്തു കുട്ടികള്‍ വരെ ഉണ്ടാവാറുണ്ട്.

"ഹെര്‍ഡിംഗ്" ഗ്രൂപ്പിലാണ് ഇവയെ പെടുത്തിയിരിക്കുന്നത്..

45.ബെല്‍ജിയന്‍ മലിനോയിസ്(Belgian Malinois)

ബല്‍ജിയന്‍ ഷീപ്പ് ഡോഗിനോട് വളരെ സാമ്യമുള്ള ഇനമാണ്.പക്ഷെ ഇവയുടെ രോമം ചെറുതും തിളക്കമേറിയാതുമാണ്.ഇടത്തരം വലിപ്പമുള്ള ഇവയുടെ മുഖം എപ്പോഴും കറുത്തനിറം ഉള്ളവ ആയിരിക്കും.പെട്ടെന്നോ വളരെ പ്രാവശ്യം കണ്ടാലോ ഒരാളോട് അടുക്കുന്ന ഇനം അല്ല ഇവ..

ഉടമയെ മാത്രമെ അനുസരിക്കൂ..അതുപോലെ ആദ്യമായി വളര്‍ത്താന്‍ പറ്റിയ ഇനം അല്ല ഇവ..ഇവയുടെ അടുത്ത് കൂടുതല്‍ മണ്ടത്തരം കാട്ടാതെ സൂക്ഷിച്ചു കൈകാര്യം ചെയ്യേണ്ട ഇനം നായ ആണ്.ഒരു പക്ഷെ ചെറിയ കൈപ്പിഴ പോലും വളരെ വലിയ പ്രശ്നത്തിന് കാരണമാവും.

മലിനോയിസ് ,ചെയ്ന്‍ ദെ ബെര്‍ജേര്‍ ബെല്ഗെ,മലിനോയിസ് ഷെപ്പെട് ഡോഗ് എന്നും പേരുണ്ട്.

ഇരുപത്തിയാറു ഇഞ്ച് വരെ ഉയരം വയ്ക്കുന്ന ഇവയ്ക്കു ഇരുപത്തിഒമ്പത് കിലോവരെ തൂക്കവും വയ്ക്കാറുണ്ട്.


മറ്റുപട്ടികളെ ഇവയുടെ അടുത്ത്‌ വിടുന്നത് സൂക്ഷിച്ചു വേണം.കുട്ടികളെ ഇഷ്ടമാണെങ്കിലും അല്പം സൂക്ഷിക്കുന്നത് നല്ലതായിരിക്കും.ഷീപ്പ്ഡോഗ് ആയതിനാല്‍ ചുറ്റുപാടും നല്ല ശ്രദ്ധയായിരിക്കും.

മികച്ച ഒരു കാവല്‍നായയായ ഇവ രക്ഷയ്ക്ക് വളര്‍ത്താന്‍ പറ്റിയ ഇനവുമാണ്.

നഗരത്തിലോ ഗ്രാമത്തിലോ വളര്‍ത്താവുന്ന ഇനമാണിവ..നല്ലപരിശീലനവും വ്യായാമവും ഇവയ്ക്കു അത്യാവശ്യമാണ്.

പതിനാലുവയസ്സ് വരെ ഇവയ്ക്കു ആയുസ്സുണ്ട്.ഇവയുടെ ഒരു പ്രസവത്തില്‍ ആറുമുതല്‍ പത്തു കുട്ടികള്‍ ഉണ്ടാവാറുണ്ട്.

"ഹെര്‍ഡിംഗ്" ഗ്രൂപ്പിലാണ് ഇവയെ പെടുത്തിയിരിക്കുന്നത്.

44.ബെല്‍ജിയന്‍ ലീക്നോയിസ്‌( Belgian Laekenois)

ബെല്‍ജിയത്തിനു വെളിയില്‍ കാണാറില്ലാത്ത ഇനം ആണിത്.ബെല്‍ജിയം ഷേപ്പെടുമായി ഇതിന്‍റെ സാരമായ വെത്യാസം ഇതിന്‍റെ ചുരുണ്ട രോമങ്ങള്‍ തന്നെ..

ഇരുപത്താറുഇഞ്ച് വരെ ഉയരം വയ്ക്കുന്ന ഇവയ്ക്കു ഇരുപത്തിഒമ്പത് കിലോവരെ തൂക്കവും വയ്ക്കും..

മറ്റു നായകളുമായി പരിചയപ്പെടുത്തുമ്പോള്‍ സൂക്ഷിക്കണം.വളരെ ചെറുപ്പത്തിലേ ഇവയുടെ കോപം നിയന്ത്രിച്ചു വളര്‍ത്തണം..വളരെ ബുദ്ധിശാലിയായ ഇവ കാര്യങ്ങള്‍ വളരെ പെട്ടെന്ന് തന്നു പഠിച്ചെടുക്കും.

കാവലിനായാലും രക്ഷയ്ക്കായാലും വളരെ സമര്‍ത്ഥനായ ഇനം തന്നെയാണിവന്‍.

നഗരമായാലും ഗ്രാമാമായാലും ഏത് അന്തരീക്ഷത്തോടും പൊരുത്തപ്പെടാനുള്ള കഴിവുള്ള ഇനമാണിത്..

പതിനാലു വയസ്സുവരെ ആയുസ്സുള്ള ഇവയുടെ ഒരു പ്രസവത്തില്‍ ആറു മുതല്‍ പത്തു കുട്ടികള്‍ വരെ കണ്ടേക്കാം.

43.ബെഡ്ലിംഗ്ടണ്‍ ടെറിയര്‍(Bedlington Terrier )

പൊതുവെ ശാന്തനായ ഈയിനം നായയെ കണ്ടാല്‍ പട്ടിയെക്കാള്‍ രോമം വടിച്ച ആടിനോടാണ് സാമ്യം.പ്രശ്നം ഉണ്ടാക്കിയാല്‍ ദേഷ്യക്കാരനായ ഇവ പൊതുവെ എല്ലാവരോടും സ്നേഹത്തോടെ ഇടപെടാന്‍ മിടുക്കനാണ്.ഇവയുടെ വാല്‍ രോമമില്ലാത്തതും വടിപോലെ നില്‍ക്കുന്നതുമാണ്..പൂച്ചയുടെയും മറ്റും പിന്നാലെ വളരെവേഗം ഓടാന്‍ ഇഷ്ടപ്പെടുന്ന ഇനമാണിത്.

റൊത്ബറി ടെറിയര്‍,ജിപ്സി ഡോഗ്,നോര്‍തംബര്‍ ലാന്‍ഡ്‌ ഫോക്സ് ടെറിയര്‍, റോഡ്ബറി എന്നും പേരുണ്ട്.

പതിനേഴര ഇഞ്ച് വരെ ഉയരം വയ്ക്കുന്ന ഇവ പതിനൊന്നു കിലോവരെ ഭാരവും വയ്ക്കും..

രോമം ഇവയുടെ അധികം പോഴിയാറില്ല എങ്കിലും ഇടയ്ക്കിടെ വെട്ടിവിടണം.വീട്ടിലുള്ള മറ്റു പട്ടികളോടും കുട്ടികളോടും വളരെ നന്നായി പെരുമാറുന്ന ഇനമാണ്.

പൊതുവെ കാവലിനായി വളര്‍ത്താവുന്ന ഇനമാണ്.പക്ഷെ രക്ഷയ്ക്ക് പറ്റിയ ഇനം അല്ല..

ബ്രിട്ടീഷ്കാരനായ പതിനാലു വയസ്സുവരെ ആയുസ്സും ഇവയുടെ ഒരുപ്രസവത്തില്‍ മൂന്നു മുതല്‍ ആറു കുഞ്ഞുങ്ങള്‍ വരെയും ഉണ്ടായിരിക്കും..

"ടെറിയര്‍" ഗ്രൂപ്പിലാണ് ഇവയെ പെടുത്തിയിരിക്കുന്നത്.

42.ബ്യുസിരോണ്‍ (Beaceron)

ഫ്രാന്‍സില്‍ ഏറ്റവും കൂടുതല്‍ ആളുകള്‍ വളര്‍ത്താന്‍ ഇഷ്ടപ്പെടുന്ന ഇവ ജോലി ചെയ്യാന്‍ എപ്പോഴും സന്നദ്ധനായിരിക്കും.ഇവയെ നിയന്ത്രിക്കാന്‍ ശേഷിയുള്ളവര്‍ മാത്രമെ ഇവയെ വളര്‍ത്താവൂ.. ഒരാളെ മാത്രം അനുസരിക്കുന്ന ഇവ അല്പം അയഞ്ഞ പ്രകൃതക്കാരനായ ഉടമയെ ഒരിക്കലും അനുസരിക്കില്ല..

വളരെ നീണ്ട വാലുള്ള ഇവയുടെ ചെവി പലപ്പോഴും ഭംഗിയ്ക്കായി മുറിച്ചു കൂര്‍പ്പിക്കാറുണ്ട്..വളരെ വേഗം പരിശീലനം ചെയ്യിപ്പിക്കാന്‍ പറ്റിയ ഇനമായ ഇവ എന്തുതരത്തിലുള്ള ജോലിയ്ക്കും തയ്യാറായിരിക്കും..

ബെര്‍ജേര്‍ ടെ ബ്യുസ്,ബ്യുസ് ഷെപ്പെട്.,ഫ്രഞ്ച് ഷോര്‍ട്ട് ഹേയ്റഡ്ഷെപ്പെട്, റെഡ് സ്റ്റൊക്കിംഗ്, ബാസ് റോഗ് എന്നുംപേരുണ്ട്.

ഇരുപത്തിഎട്ടു ഇഞ്ച് വരെ ഉയരംവയ്ക്കുന്ന ഇവ മുപ്പത്തിഒമ്പത് കിലോവരെ ഭാരവും വയ്ക്കാറുണ്ട്.

കുട്ടികളോട് ഏറ്റവും സ്നേഹം കാട്ടുന്ന ഇവയുടെ മുന്‍പില്‍ കുട്ടികളെ തൊടുക പോലും ആസാധ്യം ആയിരിക്കും.

മറ്റു നായകളെ തങ്ങളുടെ പരിധിയില്‍ കാണുന്നത് പോലും ഇവയ്ക്കിഷ്ടമല്ല..മികച്ച കാവല്‍ നായ ആയ ഇവയെ രക്ഷയ്ക്കായി ഉപയോഗിക്കാമെന്നു മാത്രമല്ലേ ആപണിയില്‍ അവയെ വെല്ലാന്‍ ചുരുക്കം നായകള്‍ക്കെ കഴിയൂ.

ഗ്രാമത്തില്‍ മാത്രം വളര്‍ത്താന്‍ പറ്റിയ ഇനമായ ഇവയെ വീട്ടിലോ,ഫ്ലാറ്റിലോ വളര്‍ത്തരുത്.എപ്പോഴും എന്തെങ്കിലും വ്യായാമം ആവശ്യമായ ഇവയുടെ ആയുസ്സ് ശരാശരി പതിനാലു വയസ്സാണ്.

41.ബീയടെഡ് കോളി.(Bearded Collie)

കണ്ടാല്‍ ഒരു സന്യാസിപട്ടി എന്ന് തോന്നുന്നവിധം മുടിയും താടിയുമുള്ള ഇവന്‍ വെറുതെ ഇരിക്കുവാന്‍ ഇഷ്ടമില്ലാത്ത ഇനം ആണ്.എപ്പോഴും എന്തെങ്കിലും ചെയ്തു കൊണ്ടിരിക്കാന്‍ ആഗ്രഹിക്കുന്ന ഇവയുടെ രോമങ്ങള്‍ വളരെ നീളമേറിയതാണ്.

ചെറുപ്പത്തില്‍ വെള്ളയും കറപ്പും കലര്‍ന്ന നിറം പിന്നീട് ചാരനിറം ആവാറുണ്ട്..താരതമ്യേന വലിയ ഇനം നായ ആയ ഇവന്‍ യുറോപ്പിലെ ഏറ്റവും പ്രാചീനമായ ഇനങ്ങളില്‍ ഒന്നാണ്..ആട്ടിന്‍കൂട്ടങ്ങളെ കൊണ്ടുനടക്കാനുള്ള ഇവന്‍റെ കഴിവ് പ്രസിദ്ധമാണെങ്കിലും ചിലപ്പോഴൊക്കെ വീട്ടിലുള്ള കുട്ടികളെയും അപ്രകാരം നിയന്ത്രിക്കുന്നത് കാണാം..പക്ഷെ കുട്ടികളോടും വീട്ടിലുള്ളവരോടും പൊതുവെ വളരെ മാന്യമായി പെരുമാറാനുള്ള ഇവന്‍റെ കഴിവില്‍ ഇവ നമ്മുടെ അരുമയാവാന്‍ അധികം സമയം വേണ്ട..

ബിയെര്‍ടി,ഹൈരി മ്യൂട് കോളി, ഹൈലാന്‍ഡ്‌ കോളി, ലോഷ് കോളി,മൌണ്ടെന്‍ സ്കോച്ച് കോളി, ഓള്‍ഡ് വെല്‍ഷ് ഗ്രേ ഷീപ്പ് ഡോഗ് എന്നും ഇവയ്ക്കു പേരുണ്ട്.

ഇരുപത്തിരണ്ട് ഇഞ്ച് ഉയരം വയ്ക്കുന്ന ഇവയ്ക്ക് ഇരുപത്തിഎട്ടു കിലോവരെ തൂക്കവും വയ്ക്കാറുണ്ട്.

കാവലിനായി ഉപയോഗിക്കാമെങ്കിലും രക്ഷയ്ക്കായി പറ്റുന്ന ഇനം അല്ല..പൊതുവെ നാണക്കാരന്‍ അല്ലെങ്കിലും അക്രമിയും അല്ല..

സ്കോട്ട്ലണ്ടുകാരനായ ഇവനെ വളര്‍ത്തുന്നവര്‍ നല്ലപോലെ സമയം ഇവയുടെ പരിശീലനത്തിനും,പരിചരണത്തിനും,വ്യായാമത്തിന് മായി ചിലവിടേണ്ടി വരും.

പതിനഞ്ച് മുതല്‍ പതിനാറ് വര്‍ഷം ആയുസ്സുള്ള ഇവയുടെ ഒരു പ്രസവത്തില്‍ നാല് മുതല്‍ എട്ടു കുട്ടികള്‍ വരെ ഉണ്ടാവാറുണ്ട്.

"ഹെര്‍ഡിംഗ്" ഗ്രൂപ്പിലാണ് ഇവയെ പെടുത്തിയിരിക്കുന്നത്..

40.ബീഗ്ലിര്‍ (Beaglier)

ബീഗിളിന്‍റെയും കവലിയര്‍ കിംഗ്‌ ചാള്‍സ് സ്പാനിയേലിന്‍റെയും സങ്കര ഇനം..വളരെയേറെ ജനപ്രിയനാണ് ആസ്ട്രെലിയക്കാരന്‍.

പതിനഞ്ച് ഇഞ്ച് വരെ ഉയരം വയ്ക്കുന്ന ഇവ പത്തു കിലോയോളം ഭാരമേ വയ്ക്കൂ..

വളരെ ശാന്തനായി ഇടപെടുന്നവനാണ് എങ്കിലും മറ്റുപട്ടികളോട് ചിലപ്പോള്‍ അല്പം പിണക്കം കാട്ടും..

പൊതുവെ വലിയ ആരോഗ്യ പ്രശ്നം ഇല്ലാത്ത ഇവ പതിനാലു വര്‍ഷം വരെ ആയുസ്സുള്ളവയാണ്..

39. ബീഗിള്‍ ഹാരിയര്‍(Beagle Harrier)

ബീഗിളിന്‍റെയും ഹാരിയറിന്‍റെയും സങ്കര ഇനം ആണ്..മികച്ച ഒരു വേട്ടപ്പട്ടി.പ്രധാനമായും കുറുക്കനെയും മാനിനേയും വേട്ടയാടാന്‍ ഉപയോഗിക്കുന്നു.

ഇരുപതു ഇഞ്ച് വരെയേ ഉയരം വയ്ക്കൂ..ഇവയ്ക്ക് ഇരുപത്തിഅഞ്ചു കിലോവരെ ഭാരവും വയ്ക്കും.

ഫ്രഞ്ച്കാരനാണ് ഇവന്‍.മനോഹരമായ തിളക്കമുള്ള രോമമാണ് ഇവന്‍റെ..വീട്ടിലുള്ള മറ്റുപട്ടികളോടും കുട്ടികളോടും നന്നായി പെരുമാറുന്ന ഇനമാണിവ..

38.ബീഗിള്‍ (Beagle)

ബ്രിട്ടിഷ്കാരനാണ് ഇവന്‍..ചാര നിറത്തിലുള്ള ഇവയുടെ കണ്ണ് തന്നെ നമ്മെ ആകര്‍ഷിക്കാന്‍ പര്യാപ്തമാണെങ്കിലും അവന്‍റെ സ്റ്റാമിനയും ധൈര്യവും അപാരവും തന്നെ..വളരെയേറെ ഓടാനും ചാടാനുമുള്ള ഈ നായയുടെ ഇഷ്ടം ഇവയെ മികച്ചൊരു ഫാമിലിഡോഗ് ആക്കുന്നു.

ഒരു വേട്ടനായ ആയ ഇവ വീട്ടില്‍ ഉള്ള എല്ലാവരോടും നന്നായി പെരുമാറുമേങ്കിലും ചെറിയ വളര്‍ത്തു ജീവികളെ ആക്രമിക്കും..(പൂച്ച,ഗിനിപിഗ് തുടങ്ങിയവയെ).

തനിച്ചാവുമ്പോള്‍ നിര്‍ത്താതെ മോങ്ങുക എന്നതാണ് ഇവയുടെ ഏറ്റവും വലിയ കുഴപ്പം..ട്രെയിനിംഗ് അത്ര എളുപ്പമല്ലെങ്കിലും ഈ ഒരു ദോഷം ചെറുപ്പത്തിലേ മാറ്റിയെടുത്തില്ലെങ്കില്‍ ഭാവിയില്‍ പ്രശ്നമാവും..

മണം പിടിക്കാനുള്ള ഇവയുടെ മികച്ചകഴിവുകൊണ്ട് ഇവയെ പലയിടത്തും സ്നിഫര്‍ ഡോഗ് ആയി ഉപയോഗിച്ചുവരുന്നു..

രണ്ടു തരത്തില്‍ വലിപ്പമുള്ള ബീഗിളുകള്‍ ഉണ്ട്..പതിമൂന്നുഇഞ്ച് വരെയുള്ളതും പതിനാറു ഇഞ്ച് വരെയുള്ളത് എന്നിങ്ങനെ..പക്ഷെ ഏതായാലും പതിനാലു കിലോവരെ മാത്രമെ തൂക്കം വരൂ..

നന്നായി കുരയ്ക്കുന്നത് കൊണ്ടു കാവലിനായി ഉപയോഗിക്കാമെങ്കിലും അപരിചിതരോടും സൌമ്യമായെ പെരുമാറൂ എന്നതുകൊണ്ട് രക്ഷയ്ക്കായി വളര്‍ത്താനാവില്ല..

പതിനഞ്ച് വയസ്സ് വരെ ആയുസ്സുള്ള ഇവയുടെ ഒരു പ്രസവത്തില്‍ അഞ്ചു മുതല്‍ ഏഴ് വരെ കുട്ടികള്‍ ഉണ്ടാകാറുണ്ട്.

"ഹൗണ്ട്" ഗ്രൂപ്പിലാണ് ഇവയെ പെടുത്തിയിരിക്കുന്നത്..

37.ബവേറിയന്‍ മൌണ്ടന്‍ ഹൗണ്ട് (Bavarian Mountain Hound )

ബെയ്റിഷര്‍ ഗെബിര്‍ഷ്വീസ്വങ്ങഗ്, ബവേറിയന്‍ മൌണ്ടന്‍ സെന്‍റ്ഹൗണ്ട് എന്നും ഇവയ്ക്കു പേരുണ്ട്..

ഉറപ്പുള്ള ശരീരമുള്ള ഈ ജെര്‍മ്മന്‍ നായ ഹൗണ്ട് ഇനത്തില്‍ വളരെ അപൂര്‍വമായ ഇനമാണ്.തല അല്പം വീതിയുള്ളതും കറുപ്പോ ചുവപ്പോ ആയ മൂക്കും ഇവയുടെ പ്രത്യേകത ആണ്.പൊങ്ങിയിരിക്കുന്ന വാലും അല്പം മടങ്ങിയ ചെവിയും ഉള്ള ഇവയുടെ രോമം ഇടതൂര്‍ന്നതും തിളക്കമുള്ളതുമാണ്..

ഇരുപത്തിഒന്നു ഇഞ്ച് വരെ ഉയരം വയ്ക്കുന്ന ഇവയ്ക്കു മുപ്പത്തിഏഴ് കിലോവരെ ഭാരം ഉണ്ടാകാറുണ്ട്.

പ്രശ്നക്കാരനല്ലെങ്കിലും വലിയ നാണം കുണുങ്ങിയാണ്‌ ഇവന്‍.വളരെയേറെ വ്യായാമം ആവശ്യമുള്ള ഇനമാണിവ..

"ഹൗണ്ട്" ഗ്രൂപ്പിലാണ് ഇവയെ പെടുത്തിയിരിക്കുന്നത്..

36.ബാസ്സെറ്റ് ഹൗണ്ട്(Basset Hound)

"ഹഷ് പപ്പി" ഡോഗ് എന്നറിയപ്പെടുന്ന ഇവയുടെ തല ബ്ലഡ് ഹൌണ്ടിനെ പോലെയും,ഉടല്‍ ഡാഷ് ഹൌണ്ടിനെ പോലെയും ആണ്.ഉയരം കുറഞ്ഞത് അല്ലെങ്കില്‍ കുള്ളന്‍ എന്നര്‍ത്ഥം വരുന്ന "ബാസ്" എന്ന ഫ്രഞ്ച് വാക്കില്‍ നിന്നാണ് ബാസ്സറ്റ് എന്ന പേരു ഈ ഫ്രാന്‍സ്കാരന്‍ നായയ്ക്ക്‌ കിട്ടിയത്.ഉയരക്കുറവെങ്കിലും ഉറപ്പുള്ള അസ്ഥിയും ശരീരവും ഇവയ്ക്കുണ്ട്.

ഇവയുടെ തൊലി അയവുള്ളതും തൂങ്ങിക്കിടക്കുന്നതുമാണ്.അതേപോലെ നീളമുള്ളതും മടങ്ങിതൂങ്ങിക്കിടക്കുന്നതുമായ കണ്‍പോളയും,ചെവിയുമാണ് ഇവയ്ക്കുള്ളത്.വീട്ടില്‍ വളര്‍ത്താന്‍ നല്ല ഇനമായ ഇവ ചിലപ്പോള്‍ മൂശട്ടക്കാരന്‍ ആണെങ്കിലും പ്രശ്നക്കാരന്‍ അല്ല..പ്രത്യേക രീതിയില്‍ ഉള്ള കുരയാണിവയുടെ.ചിലപ്പോള്‍ മോങ്ങുകയും ചെയ്യുന്ന ഇവയുടെ മണം പിടിക്കാനുള്ള ശേഷി അപാരമാണ്.

ഓടി ചെന്നു ഇരയെപ്പിടിക്കാനുള്ള ശേഷി ഇല്ലെങ്കിലും മണത്തുചെന്നു അവയെ കണ്ടെത്താനുള്ള പ്രത്യേകശേഷി പ്രശംസനീയം തന്നെ.സത്യത്തില്‍ കുറിയകാലുള്ള ഒരു വലിയപട്ടിയാണ്‌ ബാസ്സറ്റ് ഹൗണ്ട്.

പതിനഞ്ച് ഇഞ്ച് വരെയേ ഉയരം വരൂ എങ്കിലും മുപ്പതു കിലോ വരെ ഭാരം വയ്ക്കും,..

കുട്ടികളോടെ വളരെ നന്നായി പെരുമാറുന്ന ഇവ മറ്റുള്ളവരോടും നന്നായി ഇടപെടും.മറ്റു മൃഗങ്ങളുടെ (പ്രത്യേകിച്ച് മാന്‍,മുയല്‍ മുതലായ) മണം കിട്ടിയാല്‍ ചിലപ്പോള്‍ അല്പം ദേഷ്യക്കാരന്‍ ആവും.കാവലിനു നല്ല ഇനമായ ഇവയെ രക്ഷയ്ക്കായി വളര്‍ത്തുവാന്‍ കൊള്ളില്ല..

പൊതുവെ ആരോഗ്യപ്രശ്നങ്ങള്‍ ഒന്നും ഇല്ലാത്ത ഇവ പത്തു മുതല്‍ പതിമൂന്നു വയസ്സുവരെ ആയുസ്സുള്ളവയാണ്.ഇവയുടെ ഒരു പ്രസവത്തില്‍ എട്ടുമുതല്‍ പത്തു കുട്ടികള്‍ വരെ ഉണ്ടാകാറുണ്ട്.

"ഹൗണ്ട്" ഗ്രൂപ്പില്‍ ആണ് ഇവയെ പെടുത്തിയിരിക്കുന്നത്.

35.ബാസ്സറ്റ് ഫോവ് ഡേ ബ്രിടാനി(Basset Fauve de Bretagne)

ഫോണ്‍ ബ്രിട്ടാനി ബാസ്സറ്റ് എന്നും പേരുള്ള ഈ ഫ്രഞ്ച് നായയുടെ രോമം നീളമുള്ളതും ചുരുണ്ടതുമാണ്..നീളമേറിയ മടങ്ങിയ ചെവികളാണ് ഇവയുടെത്.

പതിനഞ്ച് ഇഞ്ചോളം ഉയരം വയ്ക്കുന്ന ഇവയ്ക്കു പത്തൊമ്പത് കിലോവരെ ഭാരമേ വയ്ക്കൂ.

പൊതുവെ മണം പിടിച്ചു നടക്കാന്‍ ഇഷ്ടപ്പെടുന്ന ഇവയുടെ രോമം ഇടയ്ക്കിടെ ചീകി കൊടുക്കുന്നത് നന്നായിരിക്കും.

34.ബാസെറ്റ് ബ്ല്യു ഡേ ഗാസ്കോണ്‍(Basset Bleu de Gascogne)

ഫ്രാന്‍സിനു വെളിയില്‍ അപൂര്‍വമായ ഈ ഫ്രഞ്ച് കാരന്‍ നായയുടെ തലകൂര്‍ത്തതും നീളം കുറഞ്ഞ കാലും നീളമേറിയ വാലുമാണ്.ചെറിയ ഇനം മൃഗങ്ങളെ വേട്ടയാടാന്‍ മിടുക്കനാണ് ഈയിനം.

ബ്ലു ഗാസ്കൊനി ബാസ്സറ്റ് എന്നും ഇവന് പേരുണ്ട്..

പതിനാറര ഇഞ്ച് വരെ ഉയരം വയ്ക്കുന്ന ഇവയ്ക്കു പത്തൊമ്പത് കിലോവരെ ഭാരം വയ്ക്കും.

പൊതുവെ എല്ലാവരോടും നന്നായി ഇടപെടുന്ന ഇവ കെട്ടിയിടുന്നത് ഇഷ്ട്ടമില്ലാത്ത ഇനമാണ്.

33.ബാസെഞ്ചി (Basenji)

സുന്ദരനും ആരോഗ്യവാനും ആയ ഇവയെ ആഫ്രിക്കന്‍ ബാര്‍ക്കലെസ്സ് ഡോഗ് എന്നും വിളിക്കുന്നു..നല്ലൊരു വേട്ടക്കാരനായ ഈ ആഫ്രിക്കക്കാരന്‍ കുരയ്ക്കുകയില്ലെങ്കിലും മറ്റു ശബ്ദങ്ങള്‍ ഉണ്ടാക്കി ആളുകളുടെ ശ്രദ്ധ നേടാന്‍ മിടുക്കനാണ്..

നല്ല വേഗത്തില്‍ ഓടാന്‍ മിടുക്കനായ ഇവയുടെ വാല്‍ നന്നായി ചുരുണ്ടാതാണ്..എപ്പോഴും സ്വയം നക്കി വൃത്തിയാക്കുന്ന ഇവനെ മറ്റുനായുടെ പോലെയുള്ള ഗന്ധം ഇല്ല..

കോംഗോ ഡോഗ്,കോംഗോ ബുഷ് ഡോഗ്,കോംഗോ ടെറിയര്‍,ബോങ്കോ ഡോഗ്,ആഫ്രിക്കന്‍ ബാര്‍ക്കലെസ്സ് ഡോഗ്,ആഫ്രിക്കന്‍ ബുഷ് ഡോഗ്, സണ്ടേ ഡോഗ്,ബെല്‍ജിയന്‍ കോംഗോ ഡോഗ്,ന്യാം ന്യാം ടെറിയര്‍ എന്നും പേരുണ്ട്.

പതിനേഴ്‌ ഇഞ്ചുവരെ ഉയരം വയ്ക്കുന്ന ഇവ പതിനൊന്നു കിലോ വരെ ഭാരവും വയ്ക്കും,

കുരയ്ക്കുകയില്ലെങ്കിലും നല്ലൊരു കാവല്‍ക്കാരന്‍ ആണിവ..ഇവ കുരയ്ക്കാത്തതിനാല്‍ അപരിചിതര്‍ അടുത്ത് ചെല്ലാതിരിക്കുകയാവും ബുദ്ധി..എന്നാല്‍ ഇവയുടെ വലിപ്പം കുറവായതിനാല്‍ രക്ഷയ്ക്ക് വേണ്ടി വളര്‍ത്താനാവില്ല..

പതിനാലു വര്‍ഷം വരെ ആയുസ്സുള്ള ഇവയുടെ ഒരു പ്രസവത്തില്‍ ആറു കുട്ടികള്‍ വരെ ഉണ്ടാവാറുണ്ട്..

"ഹൗണ്ട്" ഗ്രൂപ്പിലാണ് ഇവയെ പെടുത്തിയിരിക്കുന്നത്..

32.ബാല്‍കാന്‍സ്കി ഗോനിക്(Balkanski Gonic)

പഴയ യുഗോസ്ലാവിയയിലെ (ഇന്നത്തെ കിഴക്കന്‍ സെര്‍ബിയ) ബാല്‍കാന്‍ ഉപദ്വീപില്‍ നിന്നാണ് ഇവന്‍റെ വരവ്.ഒരു മികച്ച വേട്ട നായയാണിവ.മാനിനേയും കുരുനരിയേം വേട്ടയാടാന്‍ മികച്ച ഇനം..

മുഖത്തേക്ക് മടങ്ങിയിരിക്കുന്ന ചെവികളും വിശാലമായ പരന്ന മുഖവും ഇവയുടെ പ്രത്യേകത തന്നെ..

ബാല്‍കാന്‍ ഹൗണ്ട്,സെര്‍ബ്സ്കി ഗോനിക്,ബാല്‍കാന്‍ ജാഷ്ടോണ്ട് എന്നും ഇവയ്ക്കു പേരുണ്ട്.

ഇരുപത്തിയൊന്ന് ഇഞ്ച് വരെ ഉയരംവയ്ക്കുന്ന ഇവയ്ക്കു ഇരുപത്തിയൊന്ന് കിലോവരെ ഭാരവും വയ്ക്കും.

31.ബാഗിള്‍ ഹൗണ്ട് (Bagle Hound )

ബാസ്സെറ്റ് ഹൌണ്ടിന്‍റെയും ബീഗിളിന്‍റെയും സങ്കര ഇനം..
എവിടെയെങ്കിലും കിടന്നു ചുറ്റുമുള്ള കാണുവാന്‍ വലിയ കൊതിയാണ് ഇവന്..പൊതുവെ അത്ര ചുറുചുറുക്കുള്ള ഇനമല്ല..

കുട്ടികളോട് വളരെ നന്നായി പെരുമാറുന്ന ഇവന്‍റെ രോമം നീളമുള്ളവ അല്ലെങ്കിലും അലര്‍ജിയുള്ളവര്‍ ഇവയെ വളര്‍ത്താതിരിക്കുകയാവും ഭേദം..
കാവലിനോ രക്ഷയ്ക്കോ വേണ്ടി വളര്‍ത്താന്‍ പറ്റിയ ഇനം അല്ലിത്..രണ്ടിനും തീരെ മോശം..

പതിനഞ്ച് ഇഞ്ച് വരെയേ ഉയരം വയ്ക്കൂ എങ്കിലും ഇരുപത്തിമൂന്ന് കിലോവരെ ഭാരം വച്ചേക്കാം.

പൊതുവെ ഉറക്കപ്രിയനായ ഇവ ഭക്ഷണം കഴിക്കാന്‍ മാത്രമെ ഉത്സാഹം കാട്ടാറുള്ളൂ..കാര്യങ്ങള്‍ പഠിച്ചെടുക്കുന്ന കാര്യത്തിലും ഇവന്‍ പുറകോട്ടാണ്..

രാത്രിയില്‍ ചിലപ്പോള്‍ ആകാശത്തോട്ടു നോക്കി മോങ്ങുകയോ കുരയ്ക്കുകയോ ചെയ്യുന്ന ശീലവും ഇവനെ കുപ്രസിദ്ധനാക്കുന്നു..പൊതുവെ പ്രശ്നക്കാരന്‍ അല്ലാത്ത ഇനം ആണ്..

30.അസാവാഖ്(Azawakh)

വളരെ വെത്യെസ്തമായ ഒരു രൂപമാണ് ഇവയുടെ..ചെറുരോമവും (വയറില്‍ ഒട്ടും തന്നെ ഇല്ല..)വണ്ണം ഒട്ടും ഇല്ലാത്ത ശരീരവും..പട്ടിണികോലം എന്ന് തോന്നിപ്പിക്കുന്ന ഇവ വളരെ ഉയരം ഉള്ള ഇനം ആണ്..തൂങ്ങി അഗ്രം വളഞ്ഞ വാല്‍ ആണ് ഇവയുടെ.ശബ്ദം ഉണ്ടാക്കാതെ ഓടാന്‍ കഴിവുള്ളവയാണ്‌ ഇവ..

ഉടമയോട് വളരെ സ്നേഹമുള്ള ഇവ അപരിചിതരെ ആക്രമിക്കുന്ന ഇനം ആണ്..വെട്ടയ്ക്കുപയോഗിക്കുന്ന ഇവ നല്ലൊരു കാവല്‍ നായയും അതോടൊപ്പം നല്ലൊരു രക്ഷയ്ക്കുപയോഗിക്കാവുന്ന നായയും കൂടിയാണ്..

ടോരെഗ് സ്ലോഗി,ഇടിയന്‍ എല്ലെലി,ടുരേഗ് ഗ്രേ ഹൗണ്ട്,സൌത്ത് സഹാറന്‍ ഗ്രേ ഹൗണ്ട് എന്നും പേരുണ്ട് ഇവയ്ക്ക്‌.

ഇരുപത്തി ഒമ്പത് ഇഞ്ച് വരെ ഉയരം വയ്ക്കുന്ന ഇവയ്ക്കു ഇരുപത്തി അഞ്ചു കിലോ വരെ ഭാരം വയ്ക്കും.

ഗ്രാമത്തില്‍ മാത്രം വളര്‍ത്താന്‍ കൊള്ളാവുന്ന ഇവ ആഫ്രിക്കയിലെ മാലിക്കാരന്‍ ആണ്.

പതിനൊന്നു മുതല്‍ പതിമൂന്നു വരെ വര്‍ഷം ആയുസ്സുള്ള ഇവയുടെ ഒരു പ്രസവത്തില്‍ മൂന്നു മുതല്‍ ഏഴ് കുഞ്ഞുങ്ങള്‍ കാണും.

"ഹൗണ്ട്" ഗ്രൂപ്പിലാണ് ഇവയെ പെടുത്തിയിരിക്കുന്നത്..

29.ഓസ്ട്രിയന്‍ ഗ്രാന്‍ഡ്‌ബ്രാകിസ് (Austrian Grand Brackes)

മുയലിനെയും കുറുക്കനെയും പിടിക്കാനുള്ള ഇവയുടെ കഴിവാണ് ഏറ്റവും മികച്ചതെന്ന് പറയാവുന്നത്..മുറിവേറ്റതോ ചത്തതോ ആയ ഇരയെ കണ്ടെത്തുകയാണ് ഇവയുടെ പ്രധാന ജോലി.ശബ്ദം ഉണ്ടാക്കാതെ ഇരപിടിക്കാന്‍ ഇവ സമര്‍ത്ഥന്‍ ആണ്..

ഇവ നല്ല ഉയരമുള്ള പ്രദേശങ്ങളില്‍ ജീവിക്കാന്‍ കഴിവുള്ളവയാണ്‌..

ഇരുപത്തിമൂന്ന് ഇഞ്ച് വരെ ഉയരം വയ്ക്കുന്ന ഇവ ഇരുപത്തി മൂന്നു കിലോവരെ ഭാരവും വയ്ക്കും.

വളരെ പെട്ടെന്ന് തന്നെ വെട്ടയ്ക്കുള്ള ഗുണങ്ങള്‍ ഇവ പഠിച്ചെടുക്കും..

ഓസ്ട്രിയന്‍ ബ്രാന്‍ഡില്‍ ബ്രേക്ക്,ഒഷ്ട്രിശര്‍ ഗ്ലാട്ടരിജര്‍ ബ്രേക്ക്,ഓസ്ട്രിയന്‍ സ്മൂത്ത് ഹെയര്‍ട് ഹൗണ്ട് എന്നും ഇവയ്ക്കു പേരുണ്ട്..

28.ആസ്ട്രേലിയന്‍ ടെറിയര്‍(Australian Terrier)

ഇംഗ്ലീഷ് ടെറിയര്‍ അല്ലാത്ത ചുരുക്കം ചില ടെറിയര്‍ ആണിവ..

ടെറിയര്‍ ഇനത്തിലെ ഏറ്റവും ചെറിയവന്‍..ഇവനെ സ്നേഹത്തോടെ " ഓസി " എന്നും വിളിക്കാറുണ്ട്..കറുത്ത മൂക്കും കൂര്‍ത്ത ചെവിയും ഇവയുടെ പ്രത്യേകതയാണ്..

ഏത് കാലാവസ്ഥയോടും ഏത് സാഹചര്യത്തോടും പൊരുത്തപെടുന്ന ഇവ വൃദ്ധരോടും,വികലാംഗരോടും,കുട്ടികളോടും നന്നായി ഇണങ്ങി അവരോട് സ്നേഹം പ്രകടിപ്പിക്കാന്‍ ഒരു പ്രതേക കഴിവുണ്ട്.നന്നായി കുരയ്ക്കുന്ന അവ അപരിചിതരെ കണ്ടാല്‍ നിര്‍ത്താതെ കുരയ്ക്കും.അക്കാരണത്താല്‍ ഇവ നല്ല കാവല്‍ നായയാണ്‌..ധൈര്യശാലി ആണെങ്കിലും രക്ഷയ്ക്ക് ഇവയെ ഉപയോക്കിക്കാന്‍ ആവില്ല..

പതിനൊന്നു ഇഞ്ച് വരെ ഉയരം വയ്ക്കുന്ന ഇവ ആറ് കിലോ വരെ തൂക്കമേ വയ്ക്കൂ.

നല്ല അനുസരണയും ബുദ്ധിയും ഉള്ള ഇനം ആണിവ..പതിനഞ്ച് വയസ്സുവരെ ജീവിക്കുന്ന ഇവയുടെ ഒരു പ്രസവത്തില്‍ മൂന്നു മുതല്‍ നാല് കുട്ടികള്‍ വരെ ഉണ്ടാവും..

"ടെറിയര്‍" ഗ്രൂപ്പിലാണ് ഇവയെ പെടുത്തിയിരിക്കുന്നത്..

27.ആസ്ട്രേലിയന്‍ ഷെപ്പേട് (Australian Shepherd )

ആസ്ട്രേലിയയിലെ ഏറ്റവും സുന്ദരന്‍ നായ ഏത് എന്നുള്ള ചോദ്യത്തിന് മറുപടിയാണിവന്‍. നീണ്ട രോമങ്ങളും നിറവിന്യാസവും ഇവനെ സുന്ദരന്‍ ആക്കുന്നു..ചിലപ്പോള്‍ ഇവയുടെ ഒരു കണ്ണ് നീലയോ നീലകലര്‍ന്ന ചാരനിറത്തോട് കൂടിയവയോ ആയിരിക്കും..പക്ഷെ അത് ഇവയുടെ മികച്ച കാഴ്ചശക്തിയെ ബാധിക്കാറില്ല..

കുട്ടികളുടെ കൂടെ കളിക്കാനും വീട്ടുകാരുടെ ഓമനയായി ജീവിക്കാനും കഴിയുന്ന ഇവ പക്ഷെ അപരിചിതരോട് മോശമായി പെരുമാറിഎന്നിരിക്കും..പക്ഷെ അവര്‍ തനിക്കോ താന്‍ നില്ക്കുന്ന വീടിണോ വീടിണോ ഭീഷണി ആണ് എന്ന് തോന്നിയാല്‍ മാത്രമെ അവരെ ഉപദ്രവിക്കൂ.ഉടമയുടെ കൂടെ എപ്പോഴും കഴിയാന്‍ ആഗ്രഹിക്കുന്ന ഇവ കളികളില്‍ പങ്കെടുക്കാനും ഉടമയുടെ കൂടെ ചുറ്റിതിരിയാനും ഇഷ്ടം കാണിക്കും.

അപാരബുദ്ധിശാലിയും കാര്യങ്ങള്‍ വേഗം പഠിക്കുന്നവനും ആയ ഇവയെ ഗൈഡ് ഡോഗായും മയക്കുമരുന്നുകള്‍ മണം പിടിച്ചു കണ്ടെത്തുന്ന സ്നിഫര്‍ ഡോഗായും ഉപയോഗിക്കുന്നു..ഇനി അതല്ല കാലികളെയോ ആട്ടിന്‍പറ്റത്തെയോ നോക്കണോ ആണെങ്കില്‍ അതിലും നൈപുണ്യം ഉള്ളവയാണ് ഇവന്‍.

ഇരുപത്തിമൂന്ന് ഇഞ്ച് വരെ ഉയരം വയ്ക്കുന്ന ഇവ മുപ്പത്തിഅഞ്ചു കിലോ വരെ തൂക്കവും വയ്ക്കും..

കാവലിനായി ഉപയോഗിക്കാന്‍ കൊള്ളാവുന്ന ഇവ ശരാശരി രക്ഷയ്കായി ഉപയോഗപ്പെടുത്താവുന്നവയാണ്.പക്ഷെ വീട്ടില്‍ ഉള്ള ചെറു മൃഗങ്ങളെ ചിലപ്പോള്‍ ഇവ ആക്രമിക്കും..

ഗ്രാമത്തിനു പറ്റിയ ഇനം ആയ ഇവയെ പട്ടണത്തില്‍ വളര്‍ത്താന്‍ കഴിയില്ല.

പതിനാലു മുതല്‍ പതിനാറു വയസ്സ് വരെയാണ് ഇവയുടെ ആയുസ്സ്..അഞ്ചു മുതല്‍ എട്ടു വരെയാണ് ഒരു പ്രസവത്തിലെ കുഞ്ഞുങ്ങള്‍..

നാമം സൂചിപ്പിക്കുന്നത് പോലെ ആസ്ട്രേലിയക്കാരന്‍ അല്ല ഇവ.ഇവ അമേരിക്കന്‍ വംശജനാണ്..

"ഹെര്‍ഡിംഗ്" ഗ്രൂപ്പിലാണ് ഇവയെ പെടുത്തിയിരിക്കുന്നത്..

26.ആസ്ട്രേലിയന്‍ കെല്‍പി (Australian Kelpie )

വളരെ വേഗത്തില്‍ ഓടാന്‍ കഴിവുള്ളവയാണ്‌ ഇതു..മിന്നല്‍ വേഗത്തില്‍ ഓടിതുടങ്ങാന്‍ കഴിവുള്ള ഇവ പിടിച്ചു നിര്‍ത്തിയത് പോലെ നില്‍ക്കാനും ശേഷിയുള്ളവയാണ്..

ശരാശരി വലിപ്പം മാത്രം ഉള്ള ആസ്ട്രേലിയയില്‍ ഏറ്റവും കൂടുതല്‍ ഇഷ്ടപ്പെടുന്നതും ആളുകള്‍ വളര്‍ത്തുന്നതുമായ ഹെര്‍ഡിംഗ് നായ ആണ്..ആട്,മാന്‍,മുയല്‍,താറാവ് തുടങ്ങി എന്തിനേയും ഭംഗിയായി നോക്കുന്ന ഇവ എപ്പോഴും ജോലി ചെയ്യാന്‍ ആഗ്രഹിക്കുന്ന ഇനം ആണ്.

ഇരുപതു ഇഞ്ച് വരെ ഉയരം വരുന്ന ഇവയ്ക്കു ഇരുപത്തി ഒന്നു കിലോവരെ ഭാരവും വയ്ക്കും.

വീട്ടില്‍ വളര്‍ത്താനും പറ്റിയ ഇനം ആണ്..പട്ടണത്തിനു അനുയോജ്യന്‍ അല്ലാത്ത ഇവ എപ്പോഴും എന്തെങ്കിലും ചെയ്യാന്‍ ആഗ്രഹിക്കുന്നവ ആണ്.കുട്ടികളോടും മറ്റു പട്ടികളോടും ഇണങ്ങി നില്ക്കുന്ന ഇവ കാര്യങ്ങള്‍ വളരെ എളുപ്പത്തില്‍ പഠിച്ചെടുക്കും..

കാവലിനോ രക്ഷയ്ക്കോ പറ്റിയ ഇനം ആണ്..വളരെ ബുദ്ധിമാനായ ഇവയുടെ ആയുസ്സ് പത്തു മുതല്‍ പതിനാലു വയസ്സ് വരെയാണ്..ഇവയുടെ ഒരു പ്രസവത്തില്‍ നാല് മുതല്‍ ഏഴ് കുട്ടികള്‍ വരെ കാണാറുണ്ട്.

"ഹെര്‍ഡിംഗ്" ഗ്രൂപ്പിലാണ് ഇവയെ പെടുത്തിയിരിക്കുന്നത്..

25.ഓസ്ട്രേലിയന്‍ കാറ്റില്‍ ഡോഗ്(Australian Cattle Dog )

കഠിനാധ്വാനിയായ ഇവ വളരെയധികം ദൂരം യാത്ര ചെയ്യുന്ന ഇനം ആണ്..ആടിനെ മേയ്ക്കാന്‍ ഏറ്റവും പറ്റിയ ഇനങ്ങളില്‍ ഒന്നായ ഇവയെ കുതിരകളെയും താറാവുകളെയും മേയ്ക്കാനും ഉപയോഗപ്പെടുത്താം.ഒരാളെ മാത്രം ഉടമയായി അംഗീകരിക്കുന്ന ഇവ മറ്റുള്ളവരെയും അപരിചിതരേയും അടുപ്പിക്കില്ല.

മൂശട്ടക്കാരനായ ഇവന്‍ കുട്ടികളെയും പരിച്ചയമുള്ളവരെയും നന്നായി നോക്കുമെങ്കിലും അവരെയും നിയന്ത്രിക്കാന്‍ ശ്രമിക്കും..കാരണം ആ സ്വഭാവം ഇവന്‍റെ രക്തത്തില്‍ ഉള്ളതാണ്..ബദാമിന്‍റെ ആകൃതിയില്‍ കണ്ണുള്ള ഇവയുടെ കൂര്‍ത്തചെവിയും ബ്രഷ്പോലെയുള്ള വാലും കട്ടിയുള്ള രോമവും ശ്രദ്ധാകേന്ദ്രം തന്നെ..

ശരാശരി വലിപ്പമുള്ള ഇവയുടെ ശരീരം വളരെ ഉറച്ചതാണ്.ജനിക്കുമ്പോള്‍ വെളുത്ത നിറം മാത്രമുള്ള ഇവയുടെ ശരീരത്ത് പിന്നീട് പുള്ളിയും മറ്റും വരും,..

ക്വീന്‍സ് ലാന്‍ഡ്‌ ഹീലര്‍,ഹാള്‍സ് ഹീലര്‍,റെഡ് ഹീലര്‍,ബ്ലു ഹീലര്‍,ഓക്കടോ,ഹീലര്‍,ഒസ്സി എന്നും ഇവയ്ക്കു പേരുണ്ട്..

ഇരുപതു ഇഞ്ച് വരെ ഉയരം വയ്ക്കുന്ന ഇവ ഇരുപത്തിഒന്നു കിലോവരെ തൂക്കവും വയ്ക്കും.

കാവലിനായോ രക്ഷയ്ക്കായോ വളര്‍ത്താന്‍ ഏറ്റവും പറ്റിയ ഇനം ആയ ഇവ പന്ത്രണ്ടു മുതല്‍ പതിനഞ്ച് വരെ വര്‍ഷം ജീവിക്കുന്നവയാണ്.ഇവയുടെ ഒരു പ്രസവത്തില്‍ നാല് മുതല്‍ എട്ടു കുഞ്ഞുങ്ങള്‍ വരെ ഉണ്ടാവും.

"ഹെര്‍ഡിംഗ്" ഗ്രൂപ്പിലാണ് ഇവയെ പെടുത്തിയിരിക്കുന്നത്.

24.ഓസീ ഡൂഡില്‍ (Aussiedoodle)

ഇതൊരു സങ്കര ഇനം ആണ്..പൂഡിലിന്‍റെയും മിനിയേച്ചര്‍ ആസ്ട്രേലിയന്‍ ഷെപ്പെട് എന്നിവയുടെ സങ്കരം..

പൂഡിലിന്‍റെ എല്ലാ ഗുണങ്ങളും (രോമങ്ങള്‍ പോഴിയാതിരിക്കുക,പരിശീലനം ഏറ്റവും എളുപ്പം,മികച്ച അനുസരണ,സാധാരണയില്‍ കവിഞ്ഞ ബുദ്ധി..)എന്നാല്‍ ആസ്ട്രേലിയന്‍ ഷെപ്പെട് ആടുകളെ മേയ്ക്കുന്ന ഇവവും..

ഈ രണ്ടു ഗുണങ്ങളും ഒത്ത ഇനം ആണ് ഓസ്സി ഡൂഡില്‍.

ഇവയുടെ രോമം ഇടയ്ക്കിടെ ചീകണം.

23.എരീജിയോസ് (Ariegeois)

ഫ്രാന്‍സിനു വെളിയില്‍ കാണപ്പെടാത്ത ഈ ഇനം മുയലുകളെയും കുറുക്കനെയും വേട്ടയാടാന്‍ വേണ്ടിയാണ് സാധാരണഗതിയില്‍ ഉപയോഗിക്കുന്നത്.നീണ്ട വണ്ണം കുറഞ്ഞ മുഖവും ശാന്തമായ ഭാവവും ഉള്ള ഇവയുടെ ചെവി വളരെ നീളമുള്ളതും കീഴോട്ടു തൂങ്ങി കിടക്കുന്നതുമാണ്.

രണ്ടടി വരെ ഉയരം വയ്ക്കുന്ന ഇവ ഇരുപത്തിമൂന്നുകിലോവരെ തൂക്കവും വയ്ക്കും..

കുട്ടികളോട് വളരെ നന്നായി പെരുമാറുന്ന ഇവ മറ്റുനായകളോടും അപരിചിതരോടും നന്നായി പെരുമാറും..

കഠിനാധ്വാനിയായ ഇവയുടെ ഉടമ ഇവന് വളരെയധികം വ്യായാമം കൊടുക്കുവാന്‍ സമയമുള്ളയാള്‍ ആവണം..

22.അര്‍ജന്റിന്‍ ഡോഗോ(Argentine Dogo)

പോരാട്ട ഗോത്രക്കാരന്‍ ഡോഗോ

സാധാരണ ഡോഗോ

***HIGHLY DANGEROUS BREED**** (No.3)
***ലോകത്തില്‍ ഏറ്റവും അപകട കാരിയായ ഇനം***(No.3)

കരുത്തിന്‍റെ പ്രതീകമായ ഇവ കാട്ടു പന്നിയെ ഓടിച്ചു പിടിച്ചു പിന്നീട് ഉടമയ്ക്ക് അവയെ വെടിവെയ്ക്കാന്‍ അവസരം കൊടുക്കുകയുമാണ് പതിവ്.പക്ഷെ മിക്കപ്പോഴും അവയെ ഡോഗോ കൊള്ളുകയാണ് ശീലം.

ഇരുനൂറു കിലോവരെ വരുന്ന പന്നികളെ വളരെ ലാഘവത്തോടെ ഡോഗോ ആക്രമിച്ചു കീഴ്പെടുത്തും.വെളുത്ത മിനുത്ത രോമമുള്ള വലിയ ഡോഗോയെ കാണുമ്പോള്‍ തന്നെ അവയുടെ അവിശ്വനീയമായ കരുത്തു പ്രകടമാകും.

പൊതുവെ ചെറിയ മടങ്ങിയ ചെവി ഉടമകള്‍ മുറിച്ചു വീണ്ടും ചെറുതാക്കി വീണ്ടും ഇവയെ സുന്ദരന്‍ ആക്കും.ചതുരപ്പെട്ടി പോലെ തലയുള്ള ഡോഗോ ഉടമയുടെ കാല്‍ച്ചുവട്ടില്‍ കിടക്കാന്‍ ഇഷ്ടപ്പെടുന്ന ഇനം ആണെങ്കിലും അപരിചിതരോട് ഏറ്റവും മോശമായി പെരുമാരാണോ ചിലപ്പോള്‍ അവരെ കൊല്ലാന്‍ തന്നെ പേരെടുത്തവയാണ്.

കുട്ടികളോട് വളരെ നന്നായി ഇടപെടുന്ന ഇവ അപരിചിതരെ എപ്പോഴും സംശയത്തോടെ നോക്കൂ.എപ്പോഴും അവരുടെ ഓരോ ചലനവും നിരീക്ഷിക്കുന്ന ഇവ പെട്ടെന്ന് അവരെ ആക്രമിച്ചു കൊലപ്പെടുത്താന്‍ ശ്രമിക്കും..ചെറുദൂരം വെടിയുണ്ട കണക്കെ ഓടുന്ന ഇവ ദീര്‍ഘദൂരവും കുതിച്ചെത്താന്‍ ശേഷിയുള്ളവയാണ്.

അര്‍ജന്റിന്‍ മാസ്ടിഫ് എന്നും ഇവയ്ക്കു പേരുണ്ട്..

വളരെ നന്നായി കാര്യങ്ങള്‍ പഠിക്കുന്ന ഇനം ആണെങ്കിലും നായ പോരാട്ടത്തിന് മാത്രം ഉള്ള ഗോത്രത്തിലെ ഡോഗോ ഒരിക്കലും എത്ര പരിശീലനം കൊടുത്താലും വീട്ടില്‍ വളര്‍ത്താന്‍ കൊള്ളാവുന്ന ഇനം ആകില്ല.

വളരെയധികം രാജ്യങ്ങളില്‍ പൂര്‍ണ നിരോധനമോ ഭാഗിക നിയന്ത്രണമോ ഇവയ്ക്കുണ്ട്..ആസ്ട്രെലിയില്‍ ഇവയെ പൂര്‍ണമായും നിരോധിച്ചിട്ടുണ്ട്.1991 Dangerous Dog Act (UK) പ്രകാരം ഡോഗോയ്ക്ക് മൂന്നാം സ്ഥാനം ആണുള്ളത്..(ആകെ നാല് നായകളെ ഉള്‍പ്പെടുത്തിയിരിക്കുന്നു )

ഉയരത്തെക്കാള്‍ കൂടുതല്‍ നീളം വയ്ക്കുന്ന ഡോഗോയ്ക്ക് ഇരുപത്തിഏഴ് ഇഞ്ച് വരെ ഉയരവും അന്‍പത്തിഒന്‍പതു കിലോവരെ ഭാരവും വയ്ക്കും.(പോരാട്ട ഗോത്രത്തില്‍ ഉള്ളവ നാല്‍പതു കിലോവരെയേ തൂക്കംവയ്ക്കൂ )

കാവലിനു അതീവ സമര്‍ത്ഥനായ ഇവ രക്ഷയ്ക്കായ ഒരു യന്ത്രം കണക്കെയാണ്..രക്ഷയ്ക്ക് നല്ല ബോഡിഗാര്‍ഡിന്‍റെ സ്ഥാനം എപ്പോഴും അലങ്കരിക്കും..

പുറത്തു ജീവിക്കാന്‍ ഇഷ്ടപ്പെടുന്ന ഇവയ്ക്കു വളരെയധികം വ്യായാമം ആവശ്യമാണ്‌.സൂര്യാഘാതം ഏല്‍ക്കാന്‍ സാധ്യത ഉള്ള ഇനം ആയതിനാല്‍ തണല്‍ ഉള്ള സ്ഥലം ആവശ്യമാണ്‌.

പത്തു ശതമാനം ഡോഗോയും ജന്മനാ ബധിരനായി പിറക്കുന്നതിനാല്‍ മനുഷ്യന് ഭീഷണിയുള്ള ഒന്നായി പരിണമിക്കുകയാണ് പതിവ്..

പതിനൊന്നു മുതല്‍ പന്ത്രണ്ടു വരെ വര്‍ഷം ആയുസ്സുള്ള ഇവയുടെ ഒരു പ്രസവത്തില്‍ നാല് മുതല്‍ എട്ടു കുട്ടികള്‍ ഉണ്ടാകാറുണ്ട്..

"വര്‍കിംഗ് ഹൗണ്ട് " ഗ്രൂപ്പിലാണ് ഇവയെ പെടുത്തിയിരിക്കുന്നത്..

21.അപ്പെന്‍സെല്ലെര്‍ മൌണ്ടന്‍ഡോഗ്(Appenzeller )

സ്വിസ് വംശക്കാരനാണ് ഇവന്‍.

മൂന്നു നിറത്തോട് കൂടിയ മിനുത്ത രോമമുള്ള ഇവ നന്നായി ജോലി ചെയ്യാന്‍ ആഗ്രഹിക്കുന്ന ഇനമാണ്.വണ്ടി വലിക്കുക തുടങ്ങി കുതിരകള്‍ ചെയ്യുന്ന ജോലികള്‍ സന്തോഷത്തോടെ ചെയ്യാന്‍ മിടുക്കുള്ള ഇനം.

ഗ്രാമ പ്രദേശത്തിന് മാത്രം ഇണങ്ങുന്ന ഇവ പൊതുവെ ആരെയും ആക്രമിക്കാത്ത പ്രകൃതം ആണ്.കെട്ടിയിടുന്നത് ഇഷ്ടമല്ലാത്ത ഇവ പക്ഷെ കറങ്ങി നടക്കാറും ഇല്ല.ഉടമ സങ്കടത്തില്‍ പെട്ടാല്‍ എങ്ങേനെയും രക്ഷിക്കാന്‍ സന്നദ്ധനായ ഇവ കുട്ടികളോടും വളരെ നന്നായി ഇടപെടും.

ഇരുപത്തിമൂന്നു ഇഞ്ച് വരെ ഉയരം വയ്ക്കുന്ന ഇവ ഇരുപത്തിമൂന്നു കിലോവരെ തൂക്കവും വയ്ക്കും..വളരെ പെട്ടെന്ന് കാര്യങ്ങള്‍ പഠിയ്കാന്‍ ഇവയ്ക്കാവും.

പന്ത്രണ്ടു മുതല്‍ പതിനാലു വയസ്സുവരെ ജീവിക്കുന്ന ഇവയുടെ ഒരു പ്രസവത്തില്‍ നാല് മുതല്‍ എട്ടു കുട്ടികള്‍ ഉണ്ടാകാറുണ്ട്.

"ഹെര്‍ഡിംഗ്" ഗ്രൂപ്പിലാണ് ഇവയെ പെടുത്തിയിരിക്കുന്നത്.

20.ആങ്ക്ലോ ഫ്രാന്‍സൈസ്(Anglo Francais)

ആങ്ക്ലോ ഫ്രാന്‍സൈസ് അല്ലെങ്കില്‍ ഫ്രാന്‍സൈസ് ഹൗണ്ട്ഇതു ഒരിനം ബ്രീഡ് അല്ല..ഏഴ് ഇനങ്ങളെ ഒന്നിച്ചു ഈ ഗ്രൂപ്പില്‍ പെടുത്തിയിരിക്കുകയാണ്.. .

ഗ്രാന്‍ഡ്‌ ആങ്ക്ലോ ഫ്രാന്‍സൈസ് ട്രൈകളര്‍, ഗ്രാന്‍ഡ്‌ ആങ്ക്ലോ ഫ്രാന്‍സൈസ് ബ്ലാങ്ക് എട് നോയര്‍, ഗ്രാന്‍ഡ്‌ ആങ്ക്ലോ ഫ്രാന്‍സൈസ് ബ്ലാങ്ക് എട് ഓറഞ്ച്.,ഗ്രാന്‍ഡ്‌ ആങ്ക്ലോ ഫ്രാന്‍സൈസ് ബ്ലാങ്ക് ടെ പെടിറ്റ് വെനിര്‍,ഫ്രാന്‍സൈസ് ട്രൈകളര്‍,ഫ്രാന്‍സൈസ് ബ്ലാങ്ക് എട് നോയര്‍,ഫ്രാന്‍സൈസ് ബ്ലാങ്ക് എട് ഓറഞ്ച്, എന്നിവയാണ് ആ എഴിനം..

ഈ ഫ്രഞ്ച് ഹൌണ്ടുകള്‍ ഇംഗ്ലീഷ് ഫോക്സ്ഹൌണ്ടിന്‍റെയും ഫ്രഞ്ച് ഹൌണ്ട്കളുടെയും സങ്കര ഇനം ആണ്.

വളരെ ജനപ്രീതി നേടിക്കൊണ്ടിരിക്കുന്ന ഇവയെ ചിലയിനം മൃഗങ്ങളുടെ മണം പിടിച്ചു കണ്ടെത്താനും തുടര്‍ന്ന് വേട്ടയാടാന്‍ സഹായിക്കാനും ആണ് വളര്‍ത്തുന്നത്..അധോമുകനായ ഇവയെ പരിശീലനം കൊടുത്താല്‍ വീട്ടിലും വളര്‍ത്താം.

ഇരുപത്തി രണ്ടു ഇഞ്ച് വരെ ഉയരം വയ്ക്കുന്ന ഇവയ്ക്കു ഇരുപതു കിലോ വരെ ഭാരവും വയ്ക്കും..(ഗ്രാന്‍ഡ്‌ ആങ്ക്ലോ ഫ്രാന്‍സൈസ് ഇരുപത്തിഏഴ് ഇഞ്ച് വരെ ഉയരവും മുപ്പത്തിമൂന്നു കിലോ വരെ ഭാരവും വയ്ക്കും..)

അനുസരണ ഉള്ള ഇനം ആണെങ്കിലും കാവലിനോ രക്ഷയ്ക്കോ ഉപയോഗപ്പെടുത്താന്‍ കൊള്ളില്ല.പൊതുവെ വീടിനു പുറത്തു ജീവിക്കാന്‍ ഇഷ്ടപ്പെടുന്ന ഇവയെ പരിശീലനം കൊടുത്താല്‍ വീട്ടിനുള്ളിലും വളര്‍ത്താം ..

19.അനാടോളിയന്‍ ഷെപ്പേര്‍ഡ് (Anatolian Shepherd)

ഇവയെ മലയാളത്തില്‍ അനത്തോലിയന്‍ എന്ന് വിളിക്കാം എങ്കിലും അനാടോളിയന്‍ എന്നാണ് ഇവയുടെ പേര്.

വലിയ ശക്തിശാലിയായ ഇവ പൊതുവെ ശാന്താനാണ്.ഒരിക്കലും പ്രശ്നക്കാരനല്ലാത്ത ഇവ വിശ്വസ്തന്‍ ആണ്.വീതിയുള്ള മുഖവും കറുത്ത മൂക്കിനോട് ചേര്‍ന്നയിടവും നല്ല മനോഹരമായ തിളങ്ങുന്ന ഇവ കാണുവാന്‍ സുന്ദരന്‍ ആണ്.

ഗ്രേറ്റ് പൈരനിസ്സിനോട് സാദൃശ്യമുള്ള ഈ തുര്‍ക്കിക്കാരനെ പണ്ടു ചെന്നയ്ക്കളോട് വേട്ടയാടാന്‍ ഉപയോഗിച്ച്തിരുന്നുവെങ്കില്‍ ഇന്നു വേട്ടയ്ക്കും,ആട്ടിന്‍ പറ്റങ്ങളെ നോക്കാനും മാത്രമല്ല പട്ടാളത്തിലും ഉപയോഗിച്ചു വരുന്നു..ബദാമിന്‍റെ ആകൃതിയില്‍ ഉള്ള ഇവയുടെ കണ്ണുകള്‍ വളരെ ആകര്‍ഷകം ആണ്.ശരാശരി വലിപ്പം ഉള്ള ഇവയുടെ ചെവി മടങ്ങിയതാണ്.

കാവലിനും രക്ഷയ്ക്കും ഒരുപോലെ ഉപയോഗിക്കാവുന്ന ഇവ ഉടമ പ്രയാസത്തില്‍ അകപ്പെട്ടാല്‍ തന്‍റെ കഴിവിന്‍റെ പരമാവധി ഉപയോഗിക്കാന്‍ മിടുക്കനാണ്.

അപരിചിതരോട് വളരെ മോശമായി പെരുമാറുന്ന ഇവയുടെ സൌന്ദര്യം കണ്ടു അടുത്ത് കൂടുന്നവരോട് പറയാന്‍ ഉള്ളത് .."വലുപ്പമുള്ള മാന്യന്‍ അല്ല ഇവന്‍..ശക്തിശാലിയായ അപകടകാരിയാണ്."

ചോപന്‍ കൊപേഗി എന്നും കരാബാഷ് ഡോഗ് എന്നും,കരാബാസ് എന്നും പേരുള്ള ഇവയെ കന്ഗാല്‍ എന്നും പേരുണ്ട്.

മുപ്പത്തിരണ്ട് ഇഞ്ച് വരെ ഉയരം വയ്ക്കാവുന്ന ഇവയ്ക്കു അറുപത്തിനാല് കിലോവരെ ഭാരം വയ്ക്കാറുണ്ട്..

കാവലിനായി നന്നായി ഉപയോഗിക്കാവുന്ന ഇവ രക്ഷയ്ക്കായി വളരെ മിടുക്കന്‍ ആണ്.പക്ഷെ സ്വന്തം ഇടത്തിലേക്ക് ആരെയും വരാന്‍ സമ്മതിക്കാത്ത ഇവയുടെ ഉടമ ഒരു മുന്നറിയിപ്പ് വീടിനു മുമ്പില്‍ വയ്ക്കുന്നത് നന്നായിരിക്കും.

ആരോഗ്യവാനായ ഈ ഇനത്തിനു നല്ല വ്യായാമം ആവശ്യമാണ്‌..വലിയ നായകള്‍ക്ക് പൊതുവെ ആയുസ്സ് കുറവാണെങ്കിലും ഇവ പന്ത്രണ്ടു മുതല്‍ പതിനഞ്ച് വര്‍ഷം വരെ ജീവിക്കാറുണ്ട്..അഞ്ചു മുതല്‍ പത്തു വരെ കുട്ടികള്‍ ഇവയുടെ ഒരു പ്രസവത്തില്‍ ഉണ്ടാകുറുണ്ട്..

"വര്‍ക്കിംഗ്" ഗ്രൂപ്പിലാണ് ഇവയെ പെടുത്തിയിരിക്കുന്നത്..

18.അമേരിക്കന്‍ വാട്ടര്‍ സ്പാനിയേല്‍(American Water Spaniel)

അമേരിക്കന്‍ സ്റ്റേറ്റായ വിസ്കോണ്‍സന്‍റെ ദേശീയ നായ

ഇവയെ വേട്ടയ്ക്കാണ് ഉപയോഗിക്കുന്നത്. കൊന്ന മൃഗത്തെയോ പക്ഷിയെയോ ബോട്ടില്‍ നിന്നും എടുത്തു കൊണ്ടുവരാന്‍ ഇവ മിടുക്കരാണ്..എണ്ണമയം ഉള്ള ഇവയുടെ രോമം നനയുകയില്ല..ചുരുണ്ട രോമമുള്ള ഇവയുടെ കഴുത്തും തലയും മുതുകും വളരെ ഉറപ്പുള്ളതും വേട്ടയ്ക്ക് അനുയോജ്യവും ആണ്.ഇവയുടെ ഘ്രാണശക്തി പേരു കേട്ടതാണ്..

വീട്ടില്‍ വളര്‍ത്താന്‍ നല്ല ഇനം ആണെങ്കിലും നായാട്ടിനെ മുന്നില്‍ കണ്ടു കൊണ്ടാണ് മിക്കവാറും തന്നെ ഇവയെ വളര്‍ത്താറുള്ളത്..ഒന്നര അടി മാത്രം ഉയരം വയ്ക്കാറുള്ള ഇവ ഇരുപ്പത്തിഒന്നു കിലോ വരെ തൂക്കവും വയ്ക്കാറുണ്ട്..

കുട്ടികളോട് നന്നായി പെരുമാറുന്ന ഇവ സ്വന്തം ഭക്ഷണത്തോട് കൂടുതല്‍ ശ്രദ്ധ കൊടുക്കാറുണ്ട്..ഇവയുടെ പാത്രത്തിനു അടുത്ത്‌ ചെന്നാല്‍ വളരെ ദേഷ്യം കാട്ടുക പതിവാണ്..എപ്പോഴും തിരക്കോട് ജോലി ചെയ്യാന്‍ താത്പര്യം ഉള്ള ഇവ സദാസമയവും വെള്ളത്തില്‍ കളിക്കാനും വെള്ളത്തിലൂടെ പോകുന്ന പക്ഷികളെയും മീനിനെയും പിടിക്കാന്‍ ഇഷ്ടപ്പെടുന്നു..

രക്ഷയ്ക്ക് ശരാശരിയില്‍ താഴെയോ മോശമായോ ഇവ പക്ഷെ കാവലിനായി ഉപയോഗപ്പെടുന്ന ഇനമാണ്.

അല്പം ആരോഗ്യ പ്രശ്നങ്ങള്‍ ഉള്ള ഇനമായ ഇവ എപ്പോഴും വെള്ളത്തില്‍ കളിക്കാന്‍ ഇഷ്ടപ്പെടുന്നു..അതോടൊപ്പം ഇവയുടെ രോമം ജട പിടിക്കാന്‍ സാധ്യത ഉള്ളതുകൊണ്ട് ഇടയ്ക്കിടെ ചീകുന്നത് നല്ലതായിരിക്കും..

പത്തു മുതല്‍ പന്ത്രണ്ടു വയസ്സ് വരെ ജീവിക്കുന്ന ഇവയുടെ ഒരു പ്രസവത്തില്‍ നാല് മുതല്‍ ആറ് കുട്ടികള്‍ വരെ ഉണ്ടാകാറുണ്ട്.

"സ്പോര്‍ട്ടിംഗ് " ഗ്രൂപ്പിലാണ് ഇവയെ പെടുത്തിയിരിക്കുന്നത്..

17.അമേരിക്കന്‍ സ്റ്റാഫോര്‍ഡ്ഷെയര്‍ ടെറിയര്‍(American Staffordshire Terrier)

കാഴ്ചയില്‍ അമേരിക്കന്‍ പിറ്റ്ബുള്‍ ടെറിയറോട് ഏറെ സാമ്യം ഉള്ള ഇവ പക്ഷെ അവയെക്കാള്‍ അല്പം കൂടി മര്യാദ കാട്ടുന്നവരാണ്..ചെറിയ ശരീരവും ഉറച്ച മാംസപേശികളും വീതിയുള്ള തലയോടും ഇവയുടെ പ്രത്യേകതയാണ്..വിശ്വസിക്കാന്‍ കൊള്ളാവുന്നതും ആത്മസംയമനശീലനുമായ ഇവയുടെ താടിയെല്ല് വളരെ ഉറച്ചതാണ്.അതുകൊണ്ട് തന്നെ ഇവ രക്ഷയ്ക്കായി വളര്‍ത്താന്‍ ഏറ്റവും പറ്റിയ ഇനങ്ങളില്‍ ഒന്നാണ്.

പൊതുവെ ശാന്തനെന്നു തോന്നുന്ന ഇവ ആവശ്യം വരുന്നഘട്ടം സ്വന്തം ജീവന്‍ കൊടുത്തും ഉടമയെ രക്ഷിക്കും.പൊതുവെ അധികം കുരയ്ക്കാത്ത പലപ്പോഴും കാവല്‍നായ എന്ന നിലയില്‍ അത്ര ശോഭിക്കില്ല..എന്നാല്‍ ആരെങ്കിലും തന്‍റെ ചുറ്റുവട്ടത്തുള്ള എന്തെങ്കിലും എടുക്കാന്‍ ശ്രമിച്ചാല്‍ കുരയ്ക്കാതെ തന്നെ വന്നു അവരെ ആക്രമിക്കുകയും ചെയ്യും.

ശക്തിശാലിയായ ഇവയെ ചെറുപ്പത്തിലെ നല്ല പരിശീലനം കൊടുത്തില്ലെങ്കില്‍ ഒരു അപകടകാരിയായി മാറാന്‍ വളരെ സാധ്യതയുണ്ട്.

ആം സ്റ്റാഫ് ടെറിയര്‍ എന്നും പേരുള്ള ഇവ പത്തൊമ്പത് ഇഞ്ച് വരെ ഉയരവും മുപ്പത്തി ആറ്കിലോ വരെ തൂക്കവും വയ്ക്കും.

പരിശീലനം കൊടുത്താല്‍ കുട്ടികളോട് നന്നായി പെരുമാറുന്ന ഇവ പക്ഷെ വീട്ടില്‍ ഉള്ള മറ്റു മൃഗങ്ങളോടും നായകളോടും മോശമായി പെരുമാറും എന്ന് മാത്രമല്ല കൊന്നെന്നും വരും.സമാനലിംഗത്തില്‍ പെട്ട നായകളോട് എത്ര പരിശീലനം കൊടുത്താലും നന്നായി ഇവ പെരുമാറില്ല..

ഏറെ വ്യായാമം ആവശ്യമുള്ള ഇവ ഫ്ലാറ്റുകള്‍ക്ക് പറ്റിയ ഇനമല്ല.ചുറ്റുവേലി ഉള്ള വീടുകളാണ് ഏറ്റവും നല്ലത്,.പരിചയ സമ്പന്നനായ ഉടമയാവും ഇതിന് ഏറ്റവും യോജിച്ചത്.

പൊതുവെ ആരോഗ്യപ്രശ്നങ്ങള്‍ ഏറെ ഉള്ള ഇനമാണ് ഇവ.

പത്തു മുതല്‍ പന്ത്രണ്ടു വരെയാണ് പൊതുവെ ഇതിന്‍റെ ആയുസ്സ്.ഒരു പ്രസവത്തില്‍ അഞ്ചു മുതല്‍ പത്തു വരെ കുട്ടികളും ഉണ്ടാകാറുണ്ട്.

"ടെറിയര്‍" ഗ്രൂപ്പിലാണ് ഇവയെ പെടുത്തിയിരിക്കുന്നത്.